A asociación Amizade, entidade pontevedresa que traballa pola inclusión das persoas con discapacidade, mantivo este luns unha xuntanza co alcalde de Poio para esixir melloras urxentes de accesibilidade no Pazo Besada, sede dos servizos sociais municipais.
Entre as principais deficiencias detectadas, a entidade sinala a inexistencia de prazas de aparcamento reservadas para persoas con mobilidade reducida e diversos problemas estruturais que dificultan o acceso ao edificio.
Destaca especialmente, segundo alertan, o pavimento rugoso e inestable, unha rampla lateral en mal estado, zonas escorregadizas con verdín e unha porta de acceso que non permite a súa apertura de xeito autónomo dende o exterior.
"É unha situación que constitúe unha clara discriminación", subliñan dende Amizade, que propón que as futuras melloras conten co asesoramento técnico especializado, ben a través da propia asociación ou de COGAMI.
O rexedor municipal Ángel Moldes mantivo un encontro para tratar este tema con Paulo Fontán, presidente do colectivo.
O alcalde recoñeceu as carencias expostas e comprometeuse a traballar conxuntamente coa asociación para solucionar estas deficiencias.
Durante a xuntanza tamén se abordaron outras demandas previas sobre melloras de accesibilidade en diferentes puntos do concello que aínda están pendentes de resolver.
Amizade avalía positivamente a disposición do alcalde, mais anuncia que permanecerá vixiante para que os compromisos adquiridos se materialicen en accións concretas.