Nin sequera o pleno municipal, onde os políticos nos teñen afeitos a sesións rifadas, puido eludir o espírito do Nadal que nos alaga estes días. A unanimidade e os bos desexos foron a tónica na reunión mensual da corporación pontevedresa.
E iso que os temas a tratar, noutro momento, darían para longos debates. Entre eles, o atraso na apertura dos xardíns da UNED, as inundacións en Fernando Olmedo ou o estado da zona deportiva da Illa das Esculturas e a Avenida de Bos Aires.
No primeiro destes asuntos, BNG e PSOE apoiaron a proposta que presentaron os populares, coa que "sin querer estropear mucho" o ambiente do Nadal, Rafa Domínguez quixo dar un "pequeno tirón de orejas" ao Concello por non cumprir o convenio asinado.
"De sabios es rectificar", sostivo Domínguez, que confía que "en próximas fechas" os cidadáns poidan acceder a uns xardíns que estean "en boas condicións".
Iván Puentes, que lembrou que este foi un proxecto impulsado polos socialistas no pasado mandato, defendeu, a través dunha emenda que foi aprobada, que o Concello acometa a intervención prevista para que esta zona verde "sexa máis atractiva do que xa é".
Así, esta actuación suporía a posta en valor das especies botánicas, un novo axardinamento, a recuperación do estanque, a plantación de máis árbores autóctonas ou a mellora da conectividade con Monte Porreiro a través de sendas peonís.
Por parte do executivo municipal, César Mosquera garantiu que "imos a facer esa actuación", que segundo subliñou se viu atrasada pola complexidade dos tempos administrativos. "Non houbo ningunha vontade de frear ou ralentizar a execución", dixo.
Con respecto a Fernando Olmedo, os socialistas reclamaron que o Concello se poña "inmediatamente" a disposición da Xunta de Galicia para crear as zonas de inundación controlada en Valdecorvos, unha solución que "porá fin ao pesadelo dos veciños".
Puentes reivindicou que esta actuación está "encarrilada" e suporá achegar unha solución "baseada na natureza" ao conter o exceso de auga nunhas lagoas inundables, que se desaguarían cando o regacho "xa flúa naturalmente cara ao Lérez".
Ademais, reclamou que se aproveite esta intervención para crear un gran parque en Valdecorvos, vinculado a esas lagoas, rehabilitando tamén elementos etnográficos vinculados ao río e recuperando a canle e os meandros do regacho.
Mosquera asegurou que o Concello "vai responder" a esta necesidade e desvelou que xa houbo as primeiras reunións cos técnicos de Augas de Galicia para abordar este proxecto, polo que "agardo que teñamos unha solución nun tempo prudencial".
A este respecto, o líder do PP lamentou que nos últimos 25 anos "no se ha hecho demasiado" para acabar con estas inundacións, polo que confía en que o Concello "no se duerma en los laureles" para prestar a súa colaboración a Augas de Galicia.
A unanimidade plenaria mantívose na proposta do PP para resolver as deficiencias que presentan as zonas deportivas ao aire libre da Illa dás Esculturas e a Avenida de Bos Aires e que, segundo Guille Juncal, están deterioradas "dun xeito radical".
Hai, segundo enumerou, unha falta de iluminación "axeitada", un asfaltado "absolutamente deficiente" ou unha mal drenaxe que fai que se acumule auga. Esta imaxe, segundo o edil do PP, "choca con esta cidade amiga do deporte" que é Pontevedra.
A tenente de alcalde, Eva Vilaverde, defendeu o "traballo continuo" que o Concello impulsa nesas zonas, pero lembrou que esas zonas "non son unha infraestrutura deportiva" senón un espazo natural "e como tal debe ser tratado".
De cara á primavera haberá novos traballos para o acondicionamento integral da senda peonil, arranxos na drenaxe e no pavimento ou o tratamento das raíces das árbores, pero sempre coa premisa que "non imos urbanizar" o ámbito deste espazo natural.
Na sesión deste luns tamén se votou de forma unánime a moción presentada polo PSOE para acelerar a tramitación da ampliación do Campiño ou para a elaboración dun estudo para novas zonas industriais, entre elas o porto seco de Leborei.
O portavoz socialista, Iván Puentes, sostivo que Pontevedra "ten que aspirar" a captar máis emprego industrial, aproveitando a "oportunidade histórica" que ofrece a transición ecolóxica e a economía verde, metendo unha "marcha máis" á transformación da cidade.
Para Mosquera, a necesidade de solo industrial en Pontevedra "non é perentorio" nestes momentos, pero entende que a cidade ten que estar preparada. "É unha previsión para que non nos pille o touro", destacou, polo que "agardamos que vaia a ritmo seguro".
O popular Rafa Domínguez, pola súa banda, mostrou o seu apoio a que Pontevedra teña todo o solo industrial "que sea posible" e celebrou que a corporación defenda a chegada de novas empresas cando o alcalde "se ha dedicado a echarlas".
