A Garda Civil de Pontevedra volverá mostrar este fin de semana a súa faceta máis altruista durante a campaña Zampakilos Solidario do Banco de Alimentos.
Preto de 50 axentes veteranos da Subdelegación de Acción Social da Garda Civil de Pontevedra formarán parte da marea azul que recollerá as doazóns da poboación nesta campaña.
Estarán fisicamente en supermercados Eroski e Autoservicios Familia de toda a provincia. Máis da metade farano na comarca do Salnés (Vilagarcía, Cambados, Sanxenxo e Vilanova) e tamén haberá axentes en Vigo, Pontevedra, Porriño ou Baiona, entre outras localidades.
Esta entidade xa colaborou co Banco de Alimentos na Gran Recollida de finais de novembro. Nesta ocasión, participarán o dobre de gardas civís.
O compromiso da Acción Social da Garda Civil é mobilizar aos seus axentes en todas as campañas previstas ao longo do ano.
O presidente da Fundación Provincial Banco de Alimentos, José Ramón Santamaría, e o director da delegación en Pontevedra, José Luís Doval, mantiveron este mércores un encontro na Comandancia pontevedresa co tenente coronel Óscar Braña e o comandante Gerardo Calvo.
Neste encontro, puideron intercambiar impresións sobre a colaboración nesta campaña, que se celebrará este venres 14 e o sábado 15 de marzo.
Actualmente, a Fundación Provincial Banco de Alimentos atende a unhas 20.000 persoas en situación de vulnerabilidade na provincia, a través das máis de 150 ONG e entidades benéficas coas que traballamos.