Case todas as prazas ofertadas pola Universidade de Vigo no campus de Pontevedra quedaron cubertas tras o peche de período de matrícula. Os 708 novos estudantes que se incorporaron ocuparon o 98% de toda a oferta educativa para o curso 2022-2023.
Só quedaron por cubrir doce prazas, segundo os datos da propia Universidade.
Así o revelaron este mércores o reitor, Manuel Reigosa, e a vicerreitora de Estudantes e empregabilidade, Natalia Caparrini, que cualificaron estes datos de "satisfactorios", especialmente ante os problemas que está a xerar o descenso demográfico.
Neste novo curso, estudarán nas diferentes facultades e escolas do campus pontevedrés un total de 3.905 alumnos e alumnas, aos que hai que sumar otras 99 persoas do programa de maiores.
"Os datos nos indican que as cousas se fan ben e temos este recoñecemento", destacou o reitor, que non se amosou preocupado pola taxa de ocupación nos graos con menor demanda, entre eles o de Enxeñaría Forestal de Pontevedra, que só ocupou a metade das prazas ofertadas.
Algunhas delas, segundo Reigosa, poderían pasar a ser interuniversitarias, aínda que pediu "ir a modiño", asegurando que "creo que agora non hai ningunha titulación en risco de desaparecer".
As titulacións con maior taxa de ocupación foron os graos en Educación Primaria (115%), Educación infantil (113%) e Ciencias da Actividade Física e do Deporte (106%).
Con respecto aos mestrados, cursarán estudos no campus de Pontevedra un total de 218 novos estudantes, o 93% das prazas que había dispoñibles.
A Universidade de Vigo desvela que, en canto ao alumnado estranxeiro, 139 estudantes cursan titulacións de grao e 205 de mestrado, o que confirma un incremento respecto o curso pasado, no que os estudantes de grao foron 62 e 186 de mestrado.
Portugal é o país de procedencia da maior parte do alumnado estranxeiro, que por continentes, recibe a maior parte de estudantes foráneos de Italia e Alemaña (Europa); Marrocos e Exipto (África); China e India (Asia) e Ecuador e Arxentina (América).