Xeral

Alfonso Rueda, vicepresidente da Xunta, publica en Twitter que deu positivo en covid

Pontevedra
06 de xaneiro 2022
PontevedraViva

O vicepresidente primerio da Xunta e presidente provincial do Partido Popular de Pontevedra publicaba este Día de Reis, ás 14.05 horas, que se fixera un test de antíxenos con resultado positivo. "Atópome ben pero tocan uns días de illamento, teletraballo e paciencia", manifestaba o alto cargo do executivo galego, que recibía a través da mesma rede social numerosas mostras de apoio. Tamén a conselleira de Infraestruturas, Ethel Vázquez, e o delegado do Goberno, José Miñones, deron positivo

Chío de Alfonso Rueda recoñecendo o seu positivo no test de antíxenos
Chío de Alfonso Rueda recoñecendo o seu positivo no test de antíxenos

Alfonso Rueda, vicepresidente primeiro da Xunta e presidente provincial do Partido Popular de Pontevedra, publicaba este Día de Reis, ás 14.05 horas, a través da súa conta oficial da rede social Twitter, que se fixo un test de antíxenos con resultado positivo en covid-19.

"Atópome ben pero tocan uns días de illamento, teletraballo e paciencia", manifestaba o alto cargo do executivo galego, que enviaba ánimo a todas as persoas que lle seguen e a recomendación de "a coidarse moito".

Inmediatamente, a súa conta de Twitter enchíase dun fío no que se recollían numerosas mostras de apoio e ánimo. Entre outros, recibía mensaxes de Rafa Domínguez, presidente local do PP; Jorge Cubela, alcalde de Cerdedo-Cotobade;  Guille Juncal, concelleiro en Pontevedra do PP;  Novas  Xeracións dá Provincia; a directora de Turismo de Galicia, Nava Castro, ou o ex conselleiro de Educación, Jesús Vázquez.

Segundo o novo protocolo establecido pola Consellería de Sanidade, Alfonso Rueda deberá someterse a un illamento domiciliario, chamar ao teléfono de información sobre o coronavirus 881.540.045. Non precisará outra proba para confirmar este resultado e nas próximas 24 horas recibirá unha chamada telefónica da Central de Seguimento de Contactos, que xestionará unha cita telefónica co seu médico de atención primaria, realizaralle unha enquisa do caso e pediralle a listaxe de contactos estreitos.

En canto á corentena, non todos os seus contactos estreitos deberán facela. Estarán exentas aquelas persoas coas que mantivo contacto estreito que se amosen asintomáticas, se estaban completamente vacinadas na data en que se rexistrou o contacto, agás no caso de que se trate de persoas  inmunodeprimidas. Tamén estarán exentas as persoas sen síntomas que padeceron covid-19 durante o últimos seis meses.

Tamén nesta xornada confirmaban o seu positivo en covid a conselleira de Infraestruturas, Ethel Vázquez, e o delegado do Goberno en Galicia, José Miñones.

Arquivado en
Máis novidades