Chegamos a unha nova proposta culinaria de Conservas Pescamar cunha receita que combina os produtos do mar de alta calidade e o bo facer do cociñeiro Víctor Romero, da Cervecería La Fuga de Blas.
Non se perdan esta explosión de texturas e sabores, na que o cociñeiro Víctor Romero combina dúas grandes especialidades do catálogo de Conservas Pescamar: os mexillóns e os berberechos. O resultado, tanto na súa presentación como no seu gusto, é espectacular. Unha sorpresa para os sentidos que a Cervecería La Fuga de Blas xa incorpora na súa carta de tapas. Para degustala, poden achegarse polo seu local na rúa Pai Luís María Fernández, número 3, de Pontevedra.
Para preparar unhas deliciosas Albóndegas de mexillóns con cremoso de pataca e berberechos Pescamar e salsa mariñeira necesitamos os seguintes ingredientes:
Para as albóndegas de mexillóns Pescamar:
- Ovo
- Pan relado
- Aceite, allo e perexil
- Pasta kataifi
Para o cremoso de berberechos ao natural Pescamar:
- Lata de berberechos ao natural Pescamar
- Pataca
- Nata
- Sal
Para a salsa mariñeira:
- Viño branco
- Cebola, allo e perexil
- Unha folla de loureiro
- Pemento doce da Vera
- Fariña (opcional)
Elaboración:
Empezamos coa albóndega. Para iso, picamos os mexillóns Pescamar e poñémolos a lume medio co adobo de aceite, allo e perexil. Engadimos o ovo cru e o pan relado ata que se incorporen todos os ingredientes. Deixamos arrefriar a masa. A continuación, facemos unha boliña (ou máis, segundo a cantidade que desexemos) e a rebozamos coa pasta kataifi, previamente cortada en anacos pequenos. Fritimos.
Continuamos co cremoso de pataca e berberechos. Cocemos a pataca e pasámola polo batedor eléctrico, coa nata e a auga da lata de berberechos ao natural Pescamar. Na última volta, incorporamos os berberechos para que queden só triturados e notemos a súa textura.
Finalizamos coa salsa mariñeira, para a que procederemos pochando a cebola e o allo coa folla de loureiro. Incorporamos o viño branco e o pemento doce da Vera. Se se desexa, podemos espesar a salsa cunha cullerada de fariña. Rematamos cun pouco de perexil picado.
O cociñeiro Víctor Romero, da Cervecería La Fuga de Blas, proponnos acompañar o prato cun cruxiente de pan, que consiste en cortar o pan en láminas finas e pasalas por aceite, en tixola, á prancha ou mesmo ao forno.
Nuns días, farémosvos chegar unha nova proposta culinaria de alta calidade con "A cociña gourmet en conserva" de Conservas Pescamar.