Como cada quince días a Plataforma de afectados polas participacións preferentes de Marín Pontevedra repetiu a súa protesta ás portas das principais oficinas de NovaGalicia Banco na capital. Nesta ocasión contaron co apoio de afectados polas hipotecas xa que comparten un "enemigo común".
"Aunque el banco cambie de dueño y cartel en los próximos días, el nuevo propietario tiene que saber que nosotros seguiremos aquí mientras no nos devuelvan nuestro dinero", declarou un dos voceiros da Plataforma.
No seu calendario, xunto ás mobilizacións, estes afectados apuntan estes días as datas dos xuízos que se están a sinalar para os próximos meses.
En Galicia son un total de 2.229 titulares de participacións preferentes e débeda subordinada de NCG Banco os que presentaron demandas xudiciais para recuperar uns 130 millóns de euros, segundo consta no primeiro informe remitido ao Congreso pola Comisión de Seguimento de Instrumentos Híbridos de Capital e Débeda Subordinada, creada polo Goberno.