A Xunta de Goberno Local de Poio adxudicou o proxecto de humanización e mellora do Camiño Casal, situado na contorna do núcleo da Seara, na parroquia de San Xoán.
Segundo informa o Concello a actuación será levada a cabo pola empresa EC Casas cun orzamento que ascende a 162.980,54 euros, IVE incluído.
Esta mellora, asegura o goberno local, seguirá coa liña iniciada coa obra de humanización na vía principal deste núcleo, e que tamén se estende á Travesía Primeira, cuxos traballos deron comezo a finais do pasado mes de novembro. Servirá ademais para poñer a punto una das ramificacións próximas ao lugar da Seara.
A empresa adxudicataria procederá á dotación dun novo firme, que será empedrado, e á adaptación de rasantes. En canto á mellora de servizos, a actuación contempla a instalación e renovación de rede de abastecemento e de recollida de augas pluviais, ao que hai que sumar a dotación de novas luminarias de tecnoloxía LED.
A obra, que afectará a un tramo de preto dun quilómetro, financiarase con cargo ao Plan Concellos 2021 da Deputación.