A Consellería de Infraestruturas e Mobilidade vén de adxudicar este luns as obras de mellora do proceso de depuración da estación depuradora de augas residuais de Praceres por un importe duns 13 millóns de euros.
Os traballos serán executados pola unión temporal de empresas Acciona Construcción, SA e Acciona Agua, SA, e dispoñen dun prazo de execución de 27 meses, desde o inicio das mesmas.
O contrato prevé un prazo de 3 meses para a redacción do proxecto e de 12 para a súa execución, ademais doutros 12 para a posta en marcha dos novos tratamentos.
Esta actuación permitirá mellorar substancialmente a curto prazo a depuración das augas residuais dos concellos de Pontevedra, Marín, Poio e Vilaboa co obxectivo de cumprir os límites de vertido marcados pola normativa europea.
A intervención contempla a remodelación do tratamento secundario existente para garantir a axeitada depuración de ata 900 l/s de auga residual.
Esta actuación completarase coa construción dun novo emisario submarino, actualmente en fase de adxudicación e licitado por máis de 12 millóns de euros, dando cumprimento aos compromisos adquiridos coa Unión Europea.