Concluída a rolda de entrevistas institucionais do subdelegado do Goberno, Abel Losada, cos tres sindicatos con implantación na provincia (SUP, Jupol e CEP), califica de "lóxicas e moi razonables" as súas peticións para incrementar as plantillas das comisarías e destaca que co Goberno de Pedro Sánchez "creceron un 18%".
De feito, segundo os datos oficiais, en 2018 había un total de 921 policías na provincia de Pontevedra, cifra que ten medrado nos últimos seis anos ata alcanzar na actualidade os 1.086 efectivos, é dicir, case un 18% máis no conxunto provincial.
Estes incrementos producíronse en tódalas comisarías, sendo dun 16,2% na comisaría provincial, na cidade de Pontevedra; en Vigo dun 17,3%; en Vilagarcía dun 18% e, finalmente, na comisaría local de Marín alcanza un significativo 46,1%. Tamén incrementaron globalmente as dotacións das unidades de documentación e estranxeiría de Tui, Salvaterra e Lalín.
"Non podemos esquecer que a Policía Nacional tamén padeceu os efectos críticos das políticas do anterior Goberno e tampouco podemos pasar por alto que hai un clarísimo cambio de tendencia a partir de 2018, cando, a raíz do cambio político en España, tomouse a decisión de reverter os recortes e recuperar os servizos públicos", afirmou Losada.
"Eu comparto co SUP, con Jupol e coa CEP que hai que seguir incrementando as plantillas, porque así o esixe a evolución constante do fenómeno da delincuencia, pero tamén tócame, como subdelegado do Goberno que acabou cos recortes, reivindicar ese 18% de incremento, que se traduce en nada menos que 165 homes e mulleres máis traballando pola nosa seguridade nas rúas de Pontevedra, Vigo-Redondela, Vilagarcía e Marín", subliñou.