Os máis de 35 anos do ingreso da muller nas Forzas Armadas foron lembrados este venres durante a celebración do Día da Subdelegacion de Defensa en Pontevedra.
A sede desta institución na Alameda acolleu un acto castrense presidido polo subdirector xeral de administración periférica, o coronel Jesús Ángel García Lidón e ao que asistiron distintas autoridades civís e militares.
Durante o acto entregáronse condecoracións e diplomas de ascenso a unha serie de reservistas voluntarios das Forzas Armadas. A Asociación de Empresarios AEMPE recibiu unha distinción pola colaboración que prestan para que os militares poidan incorporarse á vida laboral ao cumprir 45 anos.
Tamén se entregaron os premios provinciais do concurso escolar Carta a un militar español, que gañou Helena Duarte Lojo, estudante do colexio Inmaculada de Marín, e que ten como protagonista á súa nai, unha muller militar que lle ensinou a loitar polos seus soños.
García Lidón destacou no seu discurso que a incorporación da muller ao Exército foi, "un hecho que transformaría para siempre el panorama de la Defensa Nacional, representando un avance muy significativo en la capacidad y profesionalidad de nuestros ejércitos, convirtiéndolos en una institución más moderna, justa y eficaz".
A día de hoxe España supera o 13% por cento de mulleres (practicamente 16.000) nas súas Forzas Armadas, colocándose na media alta dos países da OTAN, e está por encima da media dos países da súa contorna en canto a mulleres militares despregadas en operacións internacionais.
Cumpríronse tamén 25 anos desde que desapareceron as limitacións con total acceso da muller militar a todos corpos, escalas e destinos.
Actualmente, 6 mulleres alcanzaron o emprego de oficial xeneral, 55 son coroneis e 2 son capitáns de navío; hai unha suboficial maior e 21 mulleres son cabos maiores.