En apenas un mes chegará a próxima Semana Santa e, para estas festividades, a xunta coordinadora da Semana Santa de Pontevedra está a ultimar todos os preparativos para todas as celebracións litúrxicas e relixiosas que se realizarán na cidade.
Nesta ocasión, o pregón que marcará o inicio da Semana Santa na Boa Vila correrá a cargo do pai William Mora, un sacerdote nicaraguano actualmente acollido na parroquia de Santa María. Será o 4 de marzo, ás oito da tarde, no Teatro Principal.
Para promocionar este evento, a xunta coordinadora desvelou tamén a imaxe "fresca e creativa" que, á súa entender, ofrecen os carteis que anuncian esta semana Santa.
Os dous carteis, o que promociona o pregón e a propia Semana Santa, son obra de David Campos e foron seleccionados entre unha ampla gama de propostas.
Ambas as ilustracións, destacan desde a xunta coordinadora, "capturan a esencia e o espírito da Semana Santa na nosa cidade".
Afirman que cada un deles "reflicte a riqueza das nosas tradicións, a devoción da nosa xente e a beleza das nosas celebracións".