Por fin hai data para o inicio dos traballos para reurbanizar os terreos da ONCE en Pontevedra. Será no primeiro trimestre de 2021, segundo confirma o goberno municipal.
O Concello aprobará o próximo luns o proxecto de urbanización do polígono no que se asenta o centro de recursos educativos da ONCE, entre a rúa de Luis Braille, a rúa de Santa Lucía e o camiño das Abilleiras.
Esta actuación vaise a executar en tres fases e tivo que ser modificada como consecuencia do convenio subscrito entre a ONCE e Juan XXIII.
Segundo este convenio, a ONCE sufragará as obras de urbanización na fronte lateral dereita da parcela de Juan XXIII, no 'vial E' previsto no proxecto, desde o seu inicio na confluencia coa rúa Pintor Urbano Lugrís, nunha lonxitude de 40 metros.
Por aí comezarán as obras, segundo consta no proxecto, que terán un prazo máximo de execución de 16 meses, a contar desde o inicio das obras.
Nunha segunda fase haberá que continuar o vial urbanizado na primeira fase ata a conexión co PERI aprobado, así como o viario máis longo e estreito situado na parte dereita, o actual camiño de San Brais/Pintor Urbano Lugrís.
A urbanización da parte interior situada entre os bloques do polígono será o obxectivo da última fase destas obras, que permitirá arrombar ademais unha pequena zona verde lindeira co vial da segunda fase, o vial situado diante colexio da ONCE, que pasará a ter unha rotonda, e o treito que prolonga a rúa de Santa Lucía e ata a súa conexión coa rúa Pintor Urbano Lugrís.