A orquestra Panorama pon o broche de ouro a un Mundial de Dúatlon para a historia

Nunca antes viran tanto público e tan cálido nun Mundial de Dúatlon como o que se atoparon en Pontevedra. Esta reflexión, realizada por gran parte dos atletas que lograron medalla na nosa cidade, pódese facer extensible ao fin de festa. Porque seguro que ningún deles viviu tampouco xamais unha cerimonia de clausura tan animada como a que gozaron no Recinto Ferial xa ben entrada a noite.

E todo grazas a unha Orquestra Panorama que volveu demostrar, unha vez máis, o seu gran poder de convocatoria. Porque había atletas, si. Aínda coas bandeiras ás súas costas e ataviados coa vestimenta oficial da súa selección. Había tamén centos de pontevedreses que estiveran horas antes animando aos duatletas. Pero sobre todo había, e moitos, fans incondicionais da orquestra chegados de numerosas localidades galegas só para velos a eles.

Unha vez terminadas todas as probas e entregadas todas as medallas do Mundial de Dúatlon, os deportistas, desposuídos de todo tipo de nervios e tensións, deron renda solta ás súas ganas de festa. E atopáronse cunha actuación que, como sempre nesta orquesta, rozou a perfección. Un espectáculo de música, luz e baile que fixo as delicias de propios e estraños. Daqueles que os vían por primeira vez e dos que coñecen xa o seu repertorio de memoria.

Un fin de festa espectacular para dúas intensas xornadas de vibrante competición e coa que se despide un incrible Campionato do Mundo de Dúatlon, no que o público non cesou de arroupar a todos os participantes que se achegaron a Pontevedra para gozar do mellor do duatlón mundial.