A subdelegada do Goberno en Pontevedra, Maica Larriba, asegurou este xoves que a ocupación de vivendas "non é un problema real" na provincia e que só existen "casos puntuais" dos cales "ningún é recente".
Tras presidir a reunión da Xunta Provincial de Seguridade, Larriba explicou que segundo os datos dos responsables policiais todos os casos de vivendas ocupadas ilegalmente na provincia "veñen de anos atrás" e están protagonizados por "xente sen fogar".
"Atendendo ao que vai de ano é posible afirmar que Pontevedra é unha provincia moi segura", defendeu a subdelegada, que revelou que as cifras de infraccións penais caeu un 7% con respecto ao pasado ano.
Segundo a tipoloxía de delito, son os roubos en domicilios, en establecementos e con forza son os que presentan unha maior caída interanual, revertendo así unha situación que "preocupaba á xente" ante o incremento rexistrado noutros anos.
Este descenso prodúcese a pesar de que, segundo recoñeceu a responsable gubernativa, as cifras nos meses de verán "non son tan positivas" ante o aumento de roubos en vivendas e outros delitos que se rexistraron nas localidades de maior presenza turística.
Ademais, Maica Larriba pediu á cidadanía que "extremen as precaucións" cando fagan as súas comprar por internet ou responden a correos electrónicos fraudulentos, xa que os "ciberdelitos" seguen aumentando en Pontevedra.