A web 'Do gris ao violeta' alberga entre os seus contidos catro roteiros urbanos, centrados na historia e na memoria das mulleres de Pontevedra.
Estes paseos veñen de ser actualizados, con novos mapas e versión de texto e audio, facilitando así o acceso a todo tipo de públicos. Ademais, estes audios tamén se atopan dispoñibles en versión podcast a través das plataformas iVoox e Soundcloud.
O departamento de Memoria Histórica que dirixe o concelleiro Xaquín Moreda propón "outro xeito de coñecer a cidade ao tempo que se camiña por ela".
Se ben os roteiros contan con información escrita, e tamén existe un mapa físico que axuda a saber onde están os principais puntos de interese en relación co programa da Memoria das Mulleres, tamén é posible facer uso destes audios para vivir outra experiencia máis cómoda ou particular, ao tempo que aumenta a accesibilidade.
O primeiro é un Roteiro sobre as mulleres represaliadas de Pontevedra (deseñado por Montse Fajardo), tamén está o Roteiro Mulleres en San Amaro. Percorrido feminino polo cemiterio municipal (deseñado por Etnoga).
A terceira proposta é o Roteiro Pontevedra en feminino (deseñado por María Xesús López Escudeiro) e, por último, o Roteiro da Moureira. O río, o mar e as mulleres (deseñado por Etnoga).
Desde a concellería de Memoria histórica lembran que este formato audio tamén pode ser útil para ser engadido ou utilizado nos centros educativos da cidade, como ferramenta de divulgación entre a rapazada para unha dinamización das clases, entrando dentro das progamacións didácticas.
Nado no ano 2013, da man do Concello de Pontevedra, o proxecto 'A memoria das mulleres' ten como finalidade construír, de modo colectivo e cooperativo, un fondo documental, gráfico e audiovisual da historia das mulleres en Pontevedra.