O Goberno pon fin á obrigatoriedade de levar máscara en espazos ao aire libre. Así o anunciou a ministra de Sanidade, Carolina Darias. Esta medida será aprobada polo Consello de Ministros o vindeiro martes e entrará en vigor dous días despois, o xoves 9 de febreiro.
En España, ata o de agora, as máscaras seguían obrigatorias en todo lugar público, pechado ou aberto, excepto praias ou contornas rurais, aínda que se puidese gardar distancia de seguridade.
A eliminación desta obrigatoriedade regularase mediante un Real Decreto que a ministra de Sanidade presentará o luns na reunión do Consello Interterritorial do Saúde, no que están presentes todos os responsables autonómicos de sanidade.
Nunha entrevista na Cadena SER, Darias defendeu que esta medida serviu de "efecto barreira" para facer fronte á variante ómicron, pero que ante a baixada dos contaxios o Goberno optou por deixala sen efecto.
"Era unha medida de prudencia, polo tempo estritamente necesario ata que os indicadores aconsellasen unha decisión distinta", sinalou a ministra.
Iso si, as máscaras seguirán sendo obrigatorias en espazos interiores, unha decisión que está en vigor desde hai ano e medio, en concreto, tras o fin do confinamento na primavera de 2020.