Os xograres, protagonistas da Feira Franca 2024, deixaron no século XV constancia de todos os acontecementos históricos que hoxe reciben homenaxe nesta festa en Pontevedra. E este ano volverán deixar constancia da festa que se montará na Boa Vila o 6 e o 7 de setembro.
A área de festas do Concello de Pontevedra acaba de publicar o programa definitivo desta edición para marcar en vermello as actividades que veciñanza e visitantes poderán gozar de balde durante a celebración da Feira.
O programa está dispoñible na web oficial do Concello de Pontevedra e na web oficial da Feira Franca. Inclúe todas as actividades e horarios, ademais de contar cun mapa infográfico do centro histórico de Pontevedra e da distribución dos puntos de interese.
A programación abrirá, como é habitual, na tarde do venres 6. A partir das 19.00 horas, pregoeiros a cabalo anunciarán o comezo da XXIII edición da Feira Franca polo centro histórico.
Xa a partir das 22.00 horas será o momento do espectáculo inaugural na praza da Ferraría. Será a cargo da compañía Pablo Méndez Performance e este ano contará 'A Historia de Xan da Lus'.
Durante o sábado 7, ducias de actividades e espectáculos tomarán as rúas e prazas do centro da cidade. Non faltará o clásico e lendario Torneo Medieval que se realiza na praza de touros, en dous pases diferentes (17.30 e 20.00 horas).
Estará aberto case desde primeira hora o Mercado Medieval, recrearase o transporte do viño polas rúas de Santa Clara, Sarmiento, Pasantaría, praza da Ferraría con remate na praza da Peregrina; e a música medieval tomará cada recuncho, ao tempo que a demostración de esgrima, os grupos de animación ou o tiro con arco se viven con normalidade.
Pola tarde, os pasacalles medievais animarán a xornada a través dos tambores e a percusión, encarando unha longa noite cunha Pontevedra que estará, previsiblemente, chea de xente.
Neste programa, deixa constancia de que grazas aos xograres "creouse a tradición oral, para que a literatura obteña un rexistro da súa memoria e sexa trazable no tempo". E faise un convite á asistencia e o goce da festa, pois "precisamos historias novas coas que argallar poesía".
Durante a festa haberá xograres vidos da Provenza, de Portugal e das cortes de Castela e mesturaranse con avezados trobadores e poderosas xograresas para encher de sátiras e críticas as rúas.