Inesgotable. Así é o éxito da gastronomía pontevedresa que, un ano máis, sitúase como unha das grandes referencias da cociña española. Todos os restaurantes da provincia recoñecidos cunha Estrela Michelin lograron revalidar este distintivo de calidade.
As 'estrelas', que se entregaron este martes en Barcelona, volveron a situar a Pepe Vieira e Javier Olleros como os únicos cociñeiros galegos con dúas Estrelas Michelin, como premio ao seu traballo nos seus restaurantes de Poio -Pepe Vieira- e O Grove -Culler de Pau-.
Pepe Solla, responsable de Casa Solla, mantén a Estrela Michelin que o seu pai logrou por vez primeira en 1980; o mesmo que conseguiron Yayo Daporta para o seu restaurante de Cambados, premiado desde 2008, e Iñaki Bretal para O Eirado (Pontevedra), que se estreou en 2020.
O resto dos galardóns obtidos por restaurantes de Pontevedra foron para Rafael Centeno e Inés Abril (Maruja Limón, Vigo) e Alberto González (Silabario, Vigo), que tamén puideron reter a Estrela Michelin da que presumen desde hai anos.
Os nove galardóns que renovaron os cociñeiros pontevedreses contribúen a que Galicia some unha 'estrela' máis, chegando ata as dezanove estrelas gastronómicas -para dezasete restaurantes-. A novidade deste ano é Terra, o restaurante de Brais Pichel en Fisterra.
Nuevo 1 #EstrellasMichelin#GuiaMICHELIN2024: #Terra, Fisterra.
— La Guía MICHELIN (@GuiaMichelin_ES) November 28, 2023
Descubre el trabajo del chef Brais Pichel, que ha vuelto a su casa para dar un giro al negocio familiar y replantear, desde una visión moderna, los sabores de la Costa da Morte.#MICHELINSTAR24#GUIAMICHELINESPpic.twitter.com/z9HDwnNErJ
Súmase así a Ceibe e Nova (Ourense), O Pazo (Padrón), Casa Marcelo e A Tafona (Santiago), Árbore da Veira (A Coruña), Retiro da Costiña (Santa Comba), As Garzas (Malpica) e Miguel González (Pereiro de Aguiar), que repiten un ano máis entre os mellores restaurantes do país.
ESTRELA VERDE
A cociña pontevedresa logrou manter tamén as 'estrelas verdes' que a Guía Michelin concede anualmente a aqueles restaurantes con compromiso coa sustentabilidade.
Neste caso, este distintivo volverá lucilo tanto Pepe Vieira como Culler de Pau, os dous establecementos que xa a tiñan desde o seu primeiro ano de entrega, en 2021.