Cuntis quere ser o epicentro gastronómico, social e cultural de Galicia durante a primeira fin de semana de marzo.
Desde o venres 1 ata o domingo 3 de marzo, a vila acollerá o 25 aniversario dunha cita culinaria destacada como é a Festa do Lacón con Grelos.
Manuel Campos, alcalde de Cuntis, e os concelleiros Conchy Campos e José Antonio Fontán mantiñan durante a tarde deste xoves un encontro con representantes do sector hostaleiro do municipio para establecer a data definitiva para a celebración do evento.
O goberno local espera un éxito de público, como xa vén sucedendo en anteriores edicións. Espéranse sorpresas e actuacións musicais, camelias, ademais de diversas actividades ao redor do prato tradicional, que se farán públicas coa presentación do programa festivo.
Como aperitivo, os días 23, 24 e 25 de febreiro desenvolverase unha nova edición do TapaLacón, que servirá tamén para despedir os actos do Entroido.