Desfeita en eloxios cara Marín e, como non, cara á súa Escola Naval. Así se mostrou a ministra de Defensa, Margarita Robles, este venres durante a visita que fixo a esta academia militar para inaugurar oficialmente o curso académico 2022-2023.
En Marín estudan 496 alumnos dos máis de 6.300 que reciben ensino de formación militar nos 28 centros que as Forzas Armadas teñen en toda España e que, segundo Robles, son un "esfuerzo de innovación y superación" para adaptarse aos "nuevos tiempos".
A ministra, que chegou acompañada da subsecretaria de Defensa, Adoración Mateos, foi recibida á súa chegada á Escola Naval, entre outras autoridades militares, polo seu comandante director, Pedro Cardona; e o almirante xefe de persoal, Antonio Piñeiro.
"Estar en esta Escuela Naval es para mí una satisfacción", sinalou a titular de Defensa, que destacou que Marín é "esencial" para o exército español, especialmente para a Armada. "Es un escenario magnífico para inaugurar este nuevo curso", engadiu.
Durante a súa intervención, ante un salón de actos cheo de alumnos da escola marinense, Margarita Robles apuntou que o mundo "va muy rápido" en novas tecnoloxías e transformación dixital, dous ámbitos nos que deben formarse os futuros militares.
"El futuro pasa por la innovación, algo en lo que nuestras Fuerzas Armadas son siempre pioneras", subliñou Robles, que sinalou que esta formación é "absolutamente imprescindible", para afrontar o desempeño da súa carreira profesional.
As Forzas Armadas españolas son, segundo a ministra, un exemplo de "profesionalidad, entrega y dedicación" recoñecido en todo o mundo como demostran "cada día" en situacións "difíciles" como en Afganistán ou na defensa das fronteiras da OTAN.
Servir a España e aos seus cidadáns, aseverou Margarita Robles, "es un acto de entrega y amor", polo que aos novos alumnos das academias militares pediulles que "sigan representando" ao Exército español alá onde vaian.
Todos os militares españois, sinalou Robles, demostraron sempre o seu "compromiso con la paz y con ayudar a los demás" e fixérono, engadiu, "sin regatear esfuerzos".
"Esos valores son los que tenéis que aprender en las academias con el objetivo de ser siempre los mejores", sentenciou a ministra de Defensa.
Durante o acto, Margarita Robles quixo ter unhas palabras cara a todos os militares que, nestes momentos, están en misións no estranxeiro, aos que agradeceu a súa "profesionalidad y generosidad", que ao seu xuízo "deja muy alto el pabellón de España".
Ademais, Robles lembrou aos membros das Forzas Armadas "que ya no están", citando expresamente a Pablo Jerez Sanjuán, o cadete de 22 anos falecido en setembro de 2021 durante unhas manobras da Academia Xeral Militar de Zaragoza.
Ao termo da presentación, a ministra achegouse a conversar cun grupo de alumnos de segundo ano e interesouse pola súa formación académica, as súas preferencias e que botan de menos durante a súa estancia nesta academia.