A Deputación pon en marcha unha campaña de seguimento telefónico do plan Revitaliza. Todos os posuidores dun composteiro individual entregado polo goberno provincial recibirán unha chamada á semana dos técnicos deste programa de xestión de residuos para comprobar a correcta execución do proceso. Actualmente son 5.750 os fogares acollidos ao plan de toda a provincia.
As circuntancias de confinamento modificaron os hábitos e agora, segundo o deputado responsable do plan Revitaliza, Uxío Benítez, son os fogares familiares e non a hostalería os principais xeradores de residuos orgánicos. Para manter o control do programa, serán os usuarios os que suplan aos técnicos que achegaban a información ao sistema a través da resposta ás preguntas que lle farán os técnicos por vía telefónica, unha comunicación que servirá tamén para reforzar a súa formación nestas prácticas.
A tenencia dun composteiro individual en casa axuda tamén a cumprir as normas do confinamento, pois permite aos usuarios xestionar mellor os residuos e reducir a frecuencia das saídas para tirar o lixo. Ademais, o asesor do programa, Carlos Pérez informa de que está cientificamente probado que o virus é incapaz de sobrevivir ao proceso de compostaxe porque as temperaturas superan os 50 graos.
O persoal que se encargará de prestar este servizo telefónico son os traballadores que non forman parte dos servizos mínimos encargados de atender presencialmente os centros comunitarios. Este grupo de 25 profesionais contará co apoio de técnicos dos concellos participantes no plan Revitaliza, de Adega, Amigos dá Terra ou Fruga.