O patrón maior da Confraría de Raxó, Iago Tomé, acudiu este martes á reunión coas administracións para abordar o saneamento da ría cunha denuncia debaixo do brazo que acababa de presentar ante a fiscalía acusando á empresa Viaqua, concesionaria da xestión da depuradora dos Praceres, así como a consellería de Medio Ambiente, Augas de Galicia e o Concello de Poio ao entender que co seu deixamento de funcións cometeron delitos contra os recursos naturais e o medio ambiente.
Iago Tomé sinalou como unha casualidade a coincidencia de ambas as noticias e mostrou o seu desexo de que o Ministerio Fiscal prosiga a causa xudicial e investigue a situación que se vive nos bancos marisqueiros de Raxó e Samieira, catalogados como zona C por presenza de bacterias fecais.
O patrón maior mostrou a súa desconfianza ante as promesas dos representantes das institucións, sobre todo tendo en conta que nos atopamos nun período preelectoral e avogou por intensificar as medidas de presión.
Así propuxo a convocatoria dunha gran manifestación do sector do mar en Santiago de Compostela que visibilice o problema de contaminación de ameaza o seu medio de vida.
Entre os argumentos expostos á Fiscalía atópase unha razón de peso, a sentenza condenatoria emitida pola Xustiza europea que condenaba a España por incumprir o tratamento das augas residuais na ría de Pontevedra.