Pontevedra xa conta os días para celebrar unha das súas festas máis multitudinarias e queridas, a Feira Franca, que este ano o Concello promete que será "a máis grande de todos os tempos".
Para facela realidade, hai un traballo que non se ve e que alcalde, Miguel Anxo Fernández Lores, quixo destacar este xoves, a preparación dos elementos decorativos que ambientan a cidade.
Lores e o edil de Festas, Demetrio Gómez, visitaron o recinto feiral para coñecer os traballos de restauración e mantemento que se están levando a cabo dos elementos que compoñen a escenografía, dos que se encarga a empresa Paspallás.
A empresa está estes días inmersa en tarefas para crear elementos novos ou devolverlle a vitalidade aos anteriores, froito do desgaste. Trátase, en palabras de Lores, dun "traballo que non se ve, pero que en realidade é moitísimo traballo".
Lores explicou que todos os anos hai que facer labores de mantemento, o que inclúe repintar, montar e recuperar toda a decoración que se instala na zona monumental e na Alameda "para que a xente viva o máis parecido a unha festa dos tempos do medievo".
Estes traballos van desde o pintado de novas lonas á creación de pedras ou a restauración dos enormes dragóns que tantas fotos provocan durante os dous días que dura a Feira Franca.
Tal e como informou o Concello, os traballos están xa moi avanzados e esta semana deberían quedar finalizados. Logo será a quenda da súa instalación, xa despois das Festas da Peregrina.