O 25 de abril celébrase o cincuenta aniversario da Revolución dos Cravos e o Ateneo de Pontevedra puxo en marcha un programa de actividades para conmemorar esta data histórica baixo o título '50 anos dun soño:: 25 de abril, sempre'.
Este martes o Concello de Pontevedra presentaba os actos previstos a través de Demetrio Gómez, concelleiro de Cultura; María Xosé Tíscar, doutora en Historia Contemporánea e coordinadora do ciclo; e Manuel Reboiras, secretario do Ateneo de Pontevedra.
A programación ábrese este mércores 24 co concerto 'Cancións polas rúas do 25 de Abril', do Colectivo Xestal. Será a partir das 20.30 horas no Bar O Diaño, na Rúa Charino. O concerto está coordinado por Xico de Carinho e durante a velada recrearanse cantigas e recordos ao redor das músicas e os cantores do levantamento militar que se rexistraba en 1974 provocando a caída en Portugal da ditadura salazarista.
O xoves, a xornada principal dos actos, presentarase a 'Colectânea 2024 Sempre abril', un traballo elaborado por escritores de Portugal, Galicia, Asturias e Estremadura. Iniciarase ás 12.00 horas no Edificio Castelao do Museo de Pontevedra.
Xa ás 19.00 horas nas escaleiras do Teatro Principal levará a cabo a cantata pública e comunal onde os participantes corearán o tema que simboliza a revolución 'Grändola, Vila Morena', da man da agrupación musical Mais Cantos, que lidera Nelson Quinteiro.
Esta actividade xa se celebrou en 2023 con gran éxito de participación de público e, segundo explicaba Manuel Reboiras, esa homenaxe colectiva de Pontevedra tivo repercusión en cidades como Lisboa ou Porto.
Os asistentes recibirán caraveis e unha folla coa letra da canción para que se coree de maneira conxunta, explicaba Reboiras.
O martes 30 de abril pecharase este ciclo cunha mesa redonda no Pazo de Mugartegui, a partir das 19.00 horas. Baixo o título 'Todos eles foron Capitáns', tres dos protagonistas daqueles feitos, os integrantes do Movemento das Forzas Armadas Capitáns de Navío, Pedro Cunha Lauret e Carlos de Almada Contreiras; e o coronel Antonio Rosado dá Luz.
María Xosé Tiscar apuntou que Cunha Lauret explicará a guerra "sen fin" colonial en Angola, Guinea e Mozambique que emprendera o goberno ditatorial portugués e como os propios militares e oficiais foron evolucionando.
Pola súa banda Carlos de Almada, o militar que estableceu Grándola como símbolo da operación militar durante esa madrugada, analizará como o movemento pasou de ser o fin a unha guerra colonizadora a un golpe de estado para iniciar un proceso democratizador en Portugal.
Por último, Rosado da Luz, o coronel que falou co entón primeiro ministro Marcelo Caetano para dicirlle que abandonase o poder, tratará sobre as accións que levaron a cabo para evitar a guerra civil que promovían as forzas contrarrevolucionarias.
"Con eles temos un relato completo", manifestaba a historiadora, sobre os acontecementos que cambiaron o devir do país veciño. A cita contará coa actuación da Polifónica de Pontevedra.