Antón Masa, presidente da Asociación pola Defensa da Ría (APDR), anunciaba que o colectivo ecoloxista presenta alegacións ao proxecto sectorial de incidencia municipal (PSIS) presentado por Ence, que a Xunta de Galicia sacou a información pública, para realizar diferentes modificacións no asentamento industrial de Lourizán.
"Entendemos que vistos os documentos presentados, máis que unha modificación é unha ampliación da fábrica pura e dura", asegurou Masa este xoves alegando que con esta ampliación a fábrica provocará "máis contaminación do aire, da ría, con máis consumo de auga, aparte do impacto paisaxístico. Todo serán impactos negativos", expuxo baseándose na documentación presentada pola entidade pasteira.
Argumentan nas alegacións que os documentos presentados por ENCE son "farragosos" e que presentan erros como facer referencia a datos do ano 2021 en lugar dos actuais. Neste sentido apunta que ENCE fai referencia á concesión de captación de auga de 1,5 metros cúbicos por segundo cando a Xunta de Galicia rebaixou en 2022 esa captación a 0,6 metros cúbicos por segundo.
Masa considera que estes datos son "razón suficiente para que se incapaciten estes documentos. Fan un corta e pega e repiten datos sen que os revise ENCE, a consultar nin a Xunta, que é o máis grave".
En canto ao proxecto, a asociación ecoloxista rexeita as afirmacións de Ence cando sinala que todas as modificacións van dirixidas a mellorar a calidade do proceso produtivo diminuíndo os consumos de augas, verteduras, enerxéticos, ruídos ou cheiros.
Argumenta que no propio documento de ENCE figura que "esperan non pasar de 14 millóns de metros cúbicos de auga anuais" cando en 2020 a captación estivo por baixo dos 12,5 millóns. Ademais, a previsión da empresa é aumentar a produción a 700.000 toneladas anuais, unha cifra que para a APDR supoñerá un maior consumo de auga que o actual.
Indican que tamén aumentará o número de camións que se movan ao redor da factoría de Lourizán. E Masa tamén destacou que a propia empresa recoñece nos documentos que o cheiro "será inevitable que aumente" ao incrementar a emisión de gases.
En canto ao aspecto paisaxístico, Antón Masa entende que a incidencia será "moi superior á actual" cun aumento da superficie edificada dentro do recinto de 65.500 a 73.500 metros cadrados, coa instalación dunha nova caldeira. "Non é unha modificación calquera. *É unha ampliación dá fábrica", insiste o presidente da agrupación.
Pregúntanse cales son as razóns polas que Ence non se conecta ao novo emisario da Estación Depuradora (EDAR) de Praceres e continuará emitindo verteduras nas proximidades da Illa de Tambo. E, ademais, piden que a Xunta impida que Ence continúe captando auga do río Lérez se a empresa garante que reutilizarán a auga procedente da EDAR e a da propia fábrica.
Por último, alega que a aprobación do Proxecto Sectorial de Incidencia Supramunicipal (PSIS) de Ence provocaría unha desprotección xudicial.
Afirman tamén que debería paralizarse ata que non finalice a "problemática xudicial" pendente dunha última resolución do Tribunal Supremo en relación á sentenza da Audiencia Nacional que anulaba a prórroga e dos recursos presentados #ante o Tribunal Constitucional e a Unión Europea derivados das dúas sentenzas anteriores do Tribunal Supremo nas que autorizaba a presenza de Ence na ría pontevedresa.