Máis aló do asunto "máis sensible" para Costas, o paseo peonil a Marín, a reunión entre o goberno municipal de Pontevedra e a directora xeral deste departamento, Ana Oroño, foi frutífera para os intereses do Concello, que logrou desbloquear varias actuacións.
Dous foron os compromisos máis inmediatos que asume Costas en terreos de dominio público marítimo terrestre: a ampliación da praia fluvial de Ponte Sampaio e a rexeneración da coñecida como enseada do Ulló.
O edil da área de ordenación do territorio, César Mosquera, que celebrou que este encontro estivese presidido pola cordialidade entre ambas as partes, explicou que Costas redactará este mesmo ano os proxectos para executar estas dúas actuacións.
No caso de Ponte Sampaio, o Concello renuncia ao proxecto presentado no seu día, que non contaba co aval de Costas, e deixa en mans do Executivo central esta actuación, que manterá os mesmos criterios para ampliar a praia e recuperar a zona da Xunqueira.
Dentro desta reordenación, para a que o Concello se compromete a colaborar con Costas e achegar solucións, incluirase tamén o vello mercado de Ponte Sampaio, agora sen uso, que se integrará na nova zona verde que se habilitará en todo este ámbito.
A rexeneración da enseada do Ulló, pola súa banda, é unha actuación "relativamente fácil", xa que o único elemento que, segundo Mosquera, "perturba" este espazo natural na antiga vía ferroviaria que limitou o curso da auga convertendo a zona nunha "lameira".
A idea é ampliar o paso da auga por baixo da ponte para que toda a enseada recupere a súa "dinámica natural" e que a corrente do río "pase facilmente" por baixo do viaduto.
A terceira gran actuación comprometida con Costas ten como escenario a Illa das Esculturas. O departamento estatal encargará un estudo para suprimir as dúas comportas que limitan a canle interior da illa e cuxa instalación "é un auténtico misterio", afirmou Mosquera.
"Alguén o fixo no seu momento para regular o paso da auga pero ninguén sabe nada delas", asegurou o concelleiro do BNG, que alertou de que se non se retiran estas comportas "a illa deixará de ser illa" debido ao depósito dos sedimentos que se rexistra en toda a canle.
César Mosquera indicou que o resto dos asuntos continúan tramitándose e teñen boas perspectivas, entre elas a desafectación do Pavillón Municipal, o novo vial de Mollavao ou a desocupación da Xunqueira de Alba por parte de varios organismos públicos.
Ademais, Costas aceptou desafectar os antigos terreos de Malvar que, inicialmente o Concello destinará a aparcamento disuasorio e acepta estudar habilitar unha zona de baño na desembocadura do río Rons, que se estudará tras recuperar os terreos anexos. Para iso analizarán xuridicamente en que estado se atopan todas as parcelas integradas neste ámbito.
Pola contra, os responsables de Costas néganse a desafectar os terreos do aparcamento situado enfronte do pavillón, destinado actualmente a aparcamento, a pesar da insistencia do goberno municipal para facerse cargo da súa titularidade.
O último asunto tratado nesta reunión foi o Parque da Dignidade proxectado nos Praceres. Mosquera recoñece que "vai para largo" porque Transportes solicitou a ocupación temporal deses terreos para provisión de material.
Quere almacenar alí os materiais que necesita a obra para cumprir a sentenza contra o trazado ferroviario do tren ao porto de Marín, que partiu a parroquia en dous. "Ogallá esa obra non se faga porque é terrible", afirmou o responsable municipal.
De executarse tal e como está previsto, con pasos subterráneos para os peóns por baixo das vías, o Concello tería que reformular o proxecto do Parque da Dignidade, xa que a actuación prevista quedaría seriamente comprometida.