O cancro é o problema sociosanitario máis importante de España e do Mundo. Para o ano 2030, 1 de cada 2 homes e 1 de cada 3 mulleres terá cancro ao longo da súa vida.
Na provincia de Pontevedra, en 2023, diagnosticáronse 663 novos casos de cancro por cada 100.000 habitantes, o que supón 6.283 novos pacientes con cancro, segundo o Observatorio da Asociación Española Contra o Cancro (AECC).
A nivel nacional detectáronse 591 novos casos de cancro por cada 100.000 habitantes en 2023, o que supón 284.081 novos pacientes.
Neste contexto, no marco do Día Mundial da Investigación en Cancro, a AECC insiste na importancia de continuar fomentando a investigación en cancro e impulsar a innovación na investigación oncolóxica para achegar os resultados aos pacientes e mellorar a supervivencia en cancro.
Este venres persoas voluntarias da asociación instalaron unha mesa informativa na rúa Benito Corbal na que se divulgou a finalidade das Axudas Predoctorales AECC que é impulsar os primeiros pasos da carreira científica de persoas mozas para que poidan investigar en cancro na provincia.
Esta acción forma parte da campaña "En que se traduce a investigación científica?", co obxectivo de chegar á sociedade e que entenda o valor da investigación, achegando a linguaxe científica e o labor da Fundación Científica da Asociación.
A Asociación Española Contra o Cancro leva máis de 50 anos apoiando a investigación oncolóxica e aumentando o investimento: na actualidade conta cun investimento de 114 millóns de euros distribuídos en 603 axudas de investigación.
Desde 2020 a AECC apoiou 13 proxectos de innovación en diversas provincias. Destácanse catro proxectos de innovación relacionados co cancro de próstata, o cancro infantil, a intelixencia artificial e novos enfoques en radioterapia.