Pontevedra volverá ser capital da arte de palillar. Acollerá, un ano máis, o Encontro de Palilleiras organizado pola asociación A Fieitiña.
A cita chegará este ano á súa XVII edición e volverá ao recinto feiral pontevedrés o día 27 de abril.
Para ir quentando motores, como acción previa ao programa oficial, a asociación promove esta fin de semana, o sábado 12 e o domingo 13 de abril, un obradoiro coa profesora búlgara Bistra Pisancheva.
O alcalde, Miguel Anxo Fernández Lores, presentou este luns esta nova edición acompañado pola presidenta de A Fieitiña, Esperanza Marín.
Durante a presentación, destacou que se trata dun evento "consolidado" e un exemplo á hora de divulgar tradición, cultura e socialización.
Sinalou que o encontro é "dos máis importantes do Estado no referido á súa calidade e número de palilleiras.
Nesta mesma liña, explicou o "orgullo" de que Pontevedra acolla esta cita, que posiciona a cidade e que achega até a Boa Vila a milleiros de persoas ao longo dunha xornada realmente especial. "Pon en valor a artesanía, que cada vez tan máis importancia como motor económico no país".
Tamén quixo destacar Lores o traballo desta asociación do barrio de Monte Porreiro, que "procura un trato exquisito para todas as participantes tale como quedou demostrado ao longo dos anos".
O alcalde comprometeu o apoio municipal á cita. "Sempre contarán co noso apoio á hora de levalo a cabo", asegurou.