Juan López Uralde, Coportavoz Federal de EQUO, foi entrevistado na Cafetera de radiocable.com: "Doñana non pode converterse nunha instalación industrial". O tamén deputado do Congreso explicou: "A extracción de gas está a facerse a través de fracking nunha zona tan dependente da auga como é o Parque Natural de Doñana. É un escándalo" que, asegurou, "ocorre coa conivencia do goberno central e da Junta de Andalucía. Quen dá o primeiro permiso é o exministro Soria co goberno en funcións", engadiu.
Uralde afirmou o feito de que Doñana, como denunciou WWF, podería ser incluído pola UNESCO na lista negra de patrimonios en perigo. "O proxecto consta dun gasoduto con máis de 70 quilómetros de tubaxes por toda a zona do Parque de Doñana, ademais de 16 pozos", explicou Juan López Uralde (entrevista a partir do minuto 12:15). "Unha parte do proxecto consiste na extracción do gas que queda nalgúns antigos pozos utilizando a técnica do fracking nunha zona tan dependente da auga como é o Parque Natural de Doñana", asegurou. Ao que engadiu: "Non se fixo un estudo sísmico, e lémbranos o proxecto Castor que provocou tremores".
Desde EQUO están a reclamar a súa paralización no parlamento español. "Pero o goberno non responde e tamén o levaremos a Europa, aínda que só sexa por todo o diñeiro que deu a Unión Europea a Doñana", informou Uralde. López Uralde explicou que "este proxecto que leva desde 2005-2007 comeza impulsado por Gas Natural, da que foi conselleiro Felipe González, coincidindo coa súa presenza como presidente do Comité asesor do Parque de Doñana. Claramente a súa presenza impulsa este proxecto, incumprindo a directiva europea de impacto ambiental", engadiu.