O Liceo Casino de Pontevedra acolle a Mostra de Arte Solidaria a beneficio da Fundación Vicente Ferrer, ONG que leva máis de 55 anos acompañando o desenvolvemento integral das comunidades máis vulnerables do sur de India e, desde 2019, tamén de Nepal.

A mostra, comisariada por Mito Meijón e coordinada por Antón Sobral, reune a máis dunha trintena de artistas dispostos a construír un mundo mellor e máis igualitario coa súa obra: doando as súas pezas para a venda, que permanecerán expostas até o 21 de abril, recadan fondos para financiar o proxecto de educación inclusiva que a Fundación Vicente Ferrer leva a cabo nunha das zonas máis pobres de India, o estado de Andhra Pradesh.

Trátase dunha rede de cinco centros de educación primaria e un centro de educación secundaria nos que viven e conviven 554 menores con diferentes tipos de discapacidades (auditiva, visual ou motora) con menores sen discapacidade. Un modelo de coeducación que non só garante o acceso a unha educación de calidade e adaptada ás necesidades de cada menor, senón que tamén promove o respecto, a empatía, a tolerancia, a integración e a diversidade mediante a súa práctica diaria. A educación inclusiva é a semente para unha sociedade igualitaria libre de estigmas e discriminación.

Liceo Casino de Pontevedra

Máis eventos

Ver máis eventos