Música polo catro custados. Así foi o verán de 2024 en Pontevedra grazas ao éxito que, un ano máis, alcanzaron os dous macrofestivais que situaron á Boa Vila nun lugar destacado dentro do circuíto musical do noroeste peninsular.
A romaría urbana do Surfing the Lérez serviu de novo como pistoletazo de saída ao verán. Fíxoo cunha multitudinaria edición que, aproveitando o bo tempo, bateu todas as marcas: de asistencia, de número de concertos e de toneladas de solidariedade.
Polos escenarios do festival, que un ano máis mantivo o seu carácter gratuíto, pasaron artistas da talla de Niños Mutantes -en plena xira de despedida-, The Rapants, Terbutalina, Joe Crepúsculo, Ortiga, Nena Daconte, Juno, Grande Amore ou Boyanka Kostova.
Xa a finais de agosto, na chaira do Recinto Feiral, o Río Verbena despregou todo o seu esplendor. Foi cunha terceira edición na que se demostrou a gran acollida que tivo un festival que, co paso dos anos, optou por unha vertente máis 'indie'.
Máis de 19.000 persoas gozaron de dúas intensas xornadas cos concertos de Amaral, Lori Meyeres, Dani Fernández, Viva Suecia, Mikel Erentxun, Siloé, Vicco, Alcalá Norte, Nebulossa, Los Zigarros, Sarria ou Baiuca, que actuaron no medio da euforia do público.
A estes dous festivais que, se nada se torce, regresarán á Boa Vila en 2025, sumarase un terceiro festival que se anunciou hai apenas unhas semanas. Trátase do Big Sound Festival, que estará máis orientado cara á música urbana.
Chegará a Pontevedra, en xullo, con Nicky Jam, Rels B, Juan Magán, Omar Montes, Amaia e Abraham Mateo como cabezas de cartel, no medio dun elenco que incluirá tamén a La Zowi, Julieta, Caly y el Dandee, Depol, Marc Seguí, María Escarmiento ou a rapeira Ptazeta.
Todos eles configuran un panorama 'festivaleiro' no que, un ano máis, brillou con luz propia eventos como o PortAmérica, que tirou a casa pola xanela este 2024 ao reunir, entre outros, a Aitana, Vetusta Morla, Arde Bogotá, Juanes ou Xoel López.
Outra gran banda da música nacional como La Oreja de Van Gogh, antes da polémica saída de Leire Martínez, desatou o delirio nun SonRías Baixas no que participaron tamén Rozalén, Álvaro de Luna, Tanxugueiras, Rayden, Fillas de Cassandra ou The Rapants.
Vilagarcía de Arousa marcou o paso con Mika, Los Planetas, Crystal Fighters, Sidonie, Andrés Suárez ou Depedro no Atlantic Fest e con La Pegatina, Narco, Guadi Galego, Lendakaris Muertos, Muchachito Bombo Inferno, Dakidarría ou Tanxugueiras no Revenidas.
Ademais, Combarro recuperou o Armadiña Rock, cunha edición 100% galega liderada por Lontreira ou Deus Ke Che Crew; e en Pontevedra tamén houbo oco para un dos seus festivais clásicos, o Galegote Rock, con Ataque Escampe, Zeltia Irevire, Amoebo ou Hydn.
2024 foi o ano no que Shinova, El Drogas, La La Love You, Nil Moliner, Fillas de Cassandra, Mondra, Delaossa ou Tanxugueiras pasaron polas Festas da Peregrina e, para desgraza dos seus fans, tamén o momento no que Furious Monkey House anunciou a súa disolución.
