2024 foi un ano que volveu a demostrar o gran tirón que os escenarios naturais das Rías Baixas adquiriron como lugar de rodaxe para series e películas de todo tipo. E, nesta ocasión, coa cidade de Pontevedra como unha das súas grandes referencias.
Un das rodaxes máis intensas que viviu a Boa Vila nos últimos anos chegou con El jardinero, a serie para Netflix que durante preto de dous meses a produtora DLO Producións, do pontevedrés José Manuel Lorenzo, gravou no centro histórico da cidade.
Os actores Álvaro Rico (Hasta el cielo), Cecilia Suárez (La casa de las flores) e Catalina Sopelana (Sky Rojo) son os protagonistas desta ficción que se gravou, entre outras localizacións, na Ferrería, a Praza da Pedreira, o convento de Santa Clara ou a contorna do río Lérez.
Esta serie, que poderemos ver ao longo de 2025, céntrase na actividade dun negocio de asasinos a soldo que está oculto baixo un viveiro e unha tenda de flores, no que un asasino, aparentemente sen emocións, descobre que aínda é capaz de namorarse.
Especialmente simbólico, pola vinculación de Castelao coa cidade de Pontevedra, foi o paso pola cidade da rodaxe da película Antes de Nós, na que os directora Ángeles Huerta (O corpo aberto), recrea os anos novos do histórico escritor e intelectual galeguista.
Ademais de abordar a eclosión da gripe española, a película narrará a viaxe de Castelao e Virxinia Pereira a Bretaña en 1929, poucos meses despois da morte do seu único fillo, un periplo de dous seres rotos pola dor e que lles unirá para sempre.
Castelao, encarnado polo actor Xoán Fórneas (Acacias 38, Respira), volveu percorrer as principais rúas do centro histórico. Foi nunha rodaxe no que, ademais, numerosos pontevedreses participaron como extras para poboar as rúas de principios do século XX.
Ao longo deste 2024, tamén pasaron por Pontevedra, aínda que dunha maneira menos intensa os equipos de gravación doutras dúas películas.
Foron San Simón, dirixida por Miguel Ángel Delgado, unha película baseada en historias reais de presos republicanos que recalaron no cárcere da illa; e Romería, de Carla Simón, coa que a premiada directora de Alcarràs aborda a historia dunha familia marcada pola sida.
Até O Grove, pola súa banda, trasladouse durante tres meses o equipo da seriePunto Nemo, a ambiciosa serie de ciencia ficción coa que produtora Ficción Producciones transformou a batería militar de San Vicente nunha inhóspita illa chea de segredos e perigos.
Esta serie, que Prime Vídeo estreará no primeiro trimestre de 2025, atraeu a un elenco encabezado por Óscar Jaenada, Maxi Iglesias, Alba Flores, Eric Masip, Margarida Corceiro, Najwa Nimri ou Michelle Calvó, os membros dunha expedición oceanográfica á deriva.
Esta non foi, con todo, a única produción audiovisual que optou polo Grove, xa que Ángel Santos tamén escolleu esta localidade, xunto con Sanxenxo, para gravar a súa terceira longametraxe,Así chegou a noite, que tamén chegará ás pantallas a principios do próximo ano.
Nela, Denís Gómez (Néboa, La ley del mar) é Pablo, un escultor que, tras romper vínculo co seu pasado coñece ao vixiante dun cámping (Miquel Insua, Operación Marea Negra), que lle servirá de guía na súa nova etapa vital. A eles sumarase Andrea (Violeta Gil), a súa antiga noiva.
E Marín foi no outono, xunto con Vigo, o epicentro da rodaxe da longametraxe As liñas descontinuas, a nova película da directora Anxos Fazáns (A estación violenta), protagonizada pola actriz Mara Sánchez e polo debutante Adam Prieto.
Durante catro semanas, Fazáns deu forma á historia dunha muller de 50 anos que se está separando do seu marido. O día no que ten que abandonar o fogar no que viviu os últimos vinte anos atópase todo patas para arriba e a un dos ladróns durmido na súa cama.