O ano 2024 tiña marcado no calendario unha cita en vermello para o deporte pontevedrés e mundial, cos Xogos Olímpicos de París.
Será unha cita olímpica difícil de esquecer, e é que a representación pontevedresa foi verdadeiramente ampla, unha das maiores que se lembran. Acudían ademais con moitas expectativas.
A destacar nomes como os de Juan Saavedra, bronce parlímpico en tiro, ou das piragüistas Antía Jácome, Carolina García e Tere Portela, con diplomas. Tamén o do madrileño Diego Domínguez, cun bronce forxado no Centro Galego de Tecnificación Deportiva.
Por partes, entre finais de xullo e principios de agosto vivíronse os Xogos Olímpicos, que arrincaron cunha lembrada cerimonia inaugural no Río Sena na que a pontevedresa Támara Echegoyen tivo a honra de ser a deportista española abanderada.
A regatista, na que supuxo o peche á súa carreira olímpica, non logrou clasificarse para a loita polas medallas no 49er FX.
Si mantivo as súas opcións intactas até o final Antía Jácome, un dos nomes propios dos Xogos. Aspiraba a dous metais, e quedou verdadeiramente preto deles.
A caonísta foi cuarta no C-1 200 metros, nunha proba rapidísima na que se marcou unha nova plusmarca olímpica. De feito asegurou que estaba "moi contenta" co diploma conseguido porque "non podía dar máis, terminei valeira de todo".
A ese resultado sumoulle ademais unha sexta posición (segundo diploma olímpico) no C-2 500 xunto á madrileña María Corbera, proba na que partían entre as favoritas pero nas que como zurdas lles penalizou o vento.
Tamén conseguiron un meritorio diplomaCarolina García e Teresa Portela, esta na súa sétima participación olímpica, ao finalizar na sexta posición na final do K-4 500 metros.
Ademais en piragüismo tamén competiu o pontevedrés Pablo Crespo, semifinalista no C-1 1.000 metros.
En fútbol outra deportista que quedou ás portas da medalla foi Tere Abelleira, ao caer España nas semifinais do torneo e tamén ceder no partido polo bronce fronte a Alemaña, coa pontevedresa como titular. España si gañou medalla futbolística na competición masculina, a de ouro, nun equipo en cuxo corpo técnico participaba o adestrador lerezano Manu Fernández.
A que finalmente quedou sen competir en París 2024 foi a atleta Antía Chamosa, seleccionada como unha das opcións da marcha atlética para a remuda pero que finalmente non tomou parte do equipo por decisión técnica. Unha circunstancia que non embaza o fito conseguido só por poder chegar aos Xogos.
JUAN SAAVEDRA, MEDALLA NOS XOGOS PARALÍMPICOS
A representación pontevedresa pechouse nos Xogos Paralímpicos con Juan Antonio Saavedra, logrando o seu terceiro metal olímpico.
Fíxoo cun bronce na proba de rifle mixto de dez metros en posición tendido, categoría SH1.
A piques estivo de lograr unha segunda medalla na proba de carabina libre tendido 50 metros R6, chegando á final coa mellor puntuación de todos os participantes, pero problemas na súa arma evitaron o dobrete.
