Oproxecto urbanístico que implica a demolición do edificio do número 3 da rúa Gutiérrez Mellado e o 11 da rúa Michelena marcou a actualidade municipal durante os últimos tres anos e este 2024 fíxoo mirando en dúas direccións, cara ao xulgado e cara á multinacional Inditex.
O peche do paso peonil desde as galerías cara á rúa Gutiérrez Mellado materializouse en xaneiro 2023 dentro deste proxecto e este ano chegou a xuízo. Tras dúas suspensións, finalmente celebrouse en novembro. En decembro, ditouse sentenza.
Esa resolución xudicial truncou calquera intento de reapertura da saída das galerías Oliva cara a Gutiérrez Mellado por unha cuestión xurídica.
O Xulgado de Primeira Instancia número 1 de Pontevedra desestimou a demanda presentada por Astrid Filgueira, propietaria de 14 baixos de números impares das galerías Oliva 2, que pedía a restitución do pleno uso deste acceso ás galerías.
A sentenza, que non é firme, senón que ten opción de recurso, supón a absolución da parte demandada, a sociedade Cubreiro, propiedade da familia Corbal, dona da zona das galerías pegada a Gutiérrez Mellado, xa derrubada e pecha.
O maxistrado non entra aos motivos do peche, senón que aduce unha cuestión xurídica. Conclúe que esta demandante "errou na elección do xuízo posesorio establecido", pois por esta vía non pode reabrirse o paso unha vez que ese edificio xa foi demolido.
A sentenza caeu como un xerro de auga fría entre os comerciantes desta zona comercial da cidade.
Están "abatidos" e "preocupados", recoñece Antonio Santiago, presidente da asociación de comerciantes Galerías Oliva, un sentir que considera maioritario entre quen teñen alugado un local comercial na zona. Auguran o peche de negocios e a morte desas galerías.
O futuro das galerías tamén mira noutra dirección, a multinacional téxtil Inditex, que tamén na recta final do ano, en novembro, renunciou ao seu proxecto para construír unha macrotienda de Zara entre Michelena e Gutiérrez Mellado.
Inditex comunicou ao Concello de Pontevedra que desiste da licenza que solicitou no seu día para rehabilitar os inmobles de Michelena 11 e Gutiérrez Mellado 3 e 5 por eses problemas xudiciais xurdidos.
Durante o xuízo polo peche da saída a Gutiérrez Mellado saíu a relucir que existiron conversacións con Inditex para que abrise unha saída a esa tenda cara ás galerías, unha solución que podería axudar a mitigar os problemas actuais dos comerciantes pola falta de clientela neste corredor comercial.
Fontes consultadas por PontevedraViva sosteñen que Inditex xa estaría a sondar o mercado inmobiliario na cidade para buscar un novo emprazamento para esta macrotienda, na que pretendía unir o tres establecementos da marca: Zara, Zara Man e Zara Kids.