O loro Ravachol, símbolo tradicional do Entroido de Pontevedra, converteuse na imaxe dun dos eventos máis importantes do tríatlon: a Gran Final das Series Mundiais.
Todo pontevedrés sabe que Ravachol é historia da cidade, un papagaio cuxos devanceiros chegaron desde América en 1709 tras o afundimento dun barco na ría de Vigo, quedaron liberadas e aniñaron na zona. Un profesor de música tráello ao boticario don Perfecto Feijóo como presente e este lévao á súa botica, onde se converte na icona da cidade pola súa simpatía e carisma, alborotando e gritando cada vez que alguén pasaba ao seu ao redor.
Tras varios meses en Pontevedra, o boticario decidiu poñerlle de nome Ravachol, igual que o anarquista francés da época, François Claudius Koënigstein, famoso polos seus atentados con dinamita e que foi guillotinado en 1892, ocupando titulares da prensa mundial.
En 1913 o loro morre, causando profunda tristeza nos habitantes da Boa Vila. O cadáver é embalsamado e expóñeno na botica, que quedou pequena de tantas persoas que ían honralo. O corpo sen vida trasládano ao Circo de Artesáns, onde recibe a visita de autoridades civís e militares e, o 5 de febreiro, mércores de cinza, celébrase o enterro oficial ante multitude de persoas.
Agora, Ravachol é a imaxe do Entroido pontevedrés e da cidade, e conta cun monumento no lugar onde estivo a botica na que viviu durante anos diante da Peregrina, recibindo ao ano innumerables visitas de turistas e curiosos.
Ao tratarse dun símbolo tan importante na historia de Pontevedra, o equipo creativo da Gran Final das Series Mundiais de Tríatlon recuperouno para transformalo na mascota representativa do evento, ao igual que o foi nos Campionatos do Mundo Multideporte de 2019.
O artista local David Campos é o artífice do debuxo, representándoo con completa vitalidade, acción e diversión, e enchéndoo de cores que chaman a atención e retransmiten conceptos como o deporte, a velocidade ou a emoción.
A mascota ademais tomará forma medio humana grazas á creación de Pablo Méndez, e servirá de photocall vivente durante as xornadas que dure a competición.