O Partido Popular de Pontevedra presentou este mércores no barrio da Parda unha das súas grandes propostas electorais. A ampliación dos aparcamentos disuasorios e a creación de novas áreas para acabar cos problemas de estacionamento na Boa Vila. "En Pontevedra a xente non pode aparcar, necesitamos sitio para que poidan vir", defende o candidato Rafa Domínguez.
O encargado de explicar un proxecto valorado en 12 millóns de euros, que os populares tratarán de sacar adiante ao longo do próximos catro anos con fondos propios e subvencións europeas, foi Pablo Fernández, número 3 da lista de Domínguez.
O plan, froito de varios meses de traballo dos integrantes do partido, contempla a ampliación desde as 1.872 prazas actuais ata as 3.100. Con todo, alertan os populares de que o número actual de postos pode reducirse en 600 unidades se Costas ordena o peche dos disuasorios de Mollavao, Corbaceiras e o de fronte ao Pavillón.
"Por como está a reaccionar Costas, temos un risco grave de que tres dos grandes aparcamentos van ter que cesar o seu uso en breve porque o seu uso é ilegal", advirte Fernández.
Se isto sucede, unha cidade de 83.000 habitantes quedaría con só 1.200 prazas de aparcamento gratuítas. A solución que propón o PP pasa por "aumentar a capacidade dos disuasorios, crear novos aparcadoiros deste tipo, conectar os devanditos aparcamentos con transporte eléctrico gratuíto ao centro e, por último, dotalos de servizos básicos como vídeovixianza, aseos e aparcamento para bicicletas".
A intención do equipo de Rafa Domínguez é triplicar a capacidade destes espazos coa instalación de estruturas lixeiras de metal "como se fai nos aeroportos ou noutras cidades de Europa" e, para reducir o impacto paisaxístico, contarán cunha fachada vexetal. O obxectivo é dotar destas estruturas aos aparcamentos de Tafisa, José Malvar, Pasarón, A Parda, Martín Códax e Valdecorvos.
Así mesmo, crearanse novas superficies de aparcamento gratuíto en zonas do centro, a periferia e tamén nas parroquias. En Mollavao prevén a implantación dun novo disuasorio nos antigos terreos de Malvar, así como un en altura baixo a ponte da autoestrada. Nunha parcela próxima á estación de autobuses teñen previsto, se se fan co goberno, abrir o primeiro destas áreas de estacionamento que tería capacidade para 300 vehículos.
Tamén contemplan abrir un en Monte Porreiro, outro nos polígonos de O Campiño e O Vao, así como no barrio de Estribela.
Os populares elixiron o barrio da Parda para presentar o seu proxecto porque "a falta de aparcamento é crónica e dramática", sostén Domínguez. Para solucionar este problema, os populares propoñen a construción dun edificio de varias alturas para dar cabida a todos os vehículos que precisan aparcar preto do centro.
Así mesmo, tanto o da Parda como os demais disuasorios contarán con equipos para aparcar bicicletas de forma segura e estarán conectados en liñas regulares de autobuses eléctricos para transportar aos usuarios ao centro da cidade.
"Unha forma de unir Pontevedra coas súas parroquias e Monte Porreiro é darlle a oportunidade á xente de que poidan aparcar. Queremos que veñan, pero non queremos asolagar Pontevedra de coches. Esta é unha solucion que xa se está utilizando noutras cidades de Europa e España, cremos que é a máis eficiente", concluíu o candidato popular.