Cunha pancarta reivindicativa plantouse ante a sede da Deputación este luns a candidatura de Marea Pontevedra pedindo o peche da administración provincial.
O alcaldable de Marea, Luis Rei, explicou que a súa formación avoga pola desaparición desta institución porque "entre outros vicios de orixen ten o de non ser elixidos os seus cargos políticos a través do sufraxio direto", afirmou. Ademais entenden que duplican as competencias doutras administracións, polo que propoñen o peche e a transferencia de funcionarios e recursos a outras institucións.
No caso do Pazo Provincial, na avenida de Montero Ríos, a proposta de Marea é convertelo nun "Centro de interpretación do caciquismo".
DEBATE ELECTORAL
Luis Rei asegurou que lle parece "estraño" que a poucos días do peche da campaña electoral, os pontevedreses non tivesen tido a oportunidade de asistir a un debate electoral cos candidatos a ocupar a alcaldía a partir do 25 de maio.
Por este motivo Luis Rei emprazou a todos os candidatos a un debate para contrastar os diferentes programas e que os candidatos non se oculten "un detrás dos 'primos de Zumosol': Feijóo e Rajoy" e outro "viaxando polo mundo".