"O cliente que acode á tenda busca algo diferente para estas datas, estamos a falar dun día especial dedicado ao amor". Son palabras de Pilar Gómez, desde a experiencia de máis de 15 anos atendendo e asesorando ao cliente na tenda de lencería, corsetería e baño Isa Baltasar.
Aínda que a lencería é un produto de venda durante o ano, Pilar recoñece que "en canto se decora o escaparate, a xente vai vendo o ambiente e dámoslle ideas para regalar, é unha maneira de axudar ao cliente".
Esta clientela é de ambos sexos, coa particularidade de que na tenda comprobaron de que no caso das mulleres poden comprar para a súa parella e tamén para elas mesmas, para sorprender co agasallo posto. "Isto pasa moito cando por exemplo a parella está de viaxe e dálle apuro comprar lencería, e a muller neste caso dille que non se preocupe, que xa compra ela. Esta é unha data moi bonita porque ao final hai moito agarimo e moita diversión nas parellas".
Neste sentido, preguntámoslle se algunha vez foi cómplice dalgunha destas historias de amor. Pilar sorrí e lembra a anécdota dun cliente que quería sorprender á súa muller, clienta habitual, pero había un problema. A parella compartía todo, incluso o teléfono móbil. Entón o home deulle a Pilar instrucións da frase que lle tiña que escribir nunha mensaxe para avisarlle de cando chegase á tenda o modelo que encargara. "Foi un pouco caos, pero ao final conseguímolo, non se decatou, sorprendeuna e a verdade é que quedou encantada, de feito pasaron os dous pola tenda para agradecerme e desculpándose por meterme nese embolado, foi moi bonito velos tan felices".
Para este San Valentín, en Isa Baltasar ofrecen para muller as propostas en lencería exclusiva de Lisa Charmel, "que é unha firma francesa onde moitos dos encaixes veñen incrustados a man, ten un traballo delicado detrás e un deseño que loxicamente hai que pagar, porque te levas unha peza moi especial", aclara Pilar Gómez. "Nós procuramos ter unha liña máis especial para estas datas. Negro e vermello son as cores punteiras, pero a tendencia é mesturar negro con nude cun fondo máis sofisticado, un pouquiño máis elegante. Os clientes buscan algo máis sexi pero delicado, que a persoa se sinta elegante ese día".
Esta sofisticación na lencería non está rifada coa comodidade, outro aspecto imprescindible para as pezas de Isa Baltasar. "É moi importante que ti te compres un conxunto, chegues á casa, o poñas e que sexa como unha segunda pel, cos mellores encaixes, os mellores tecidos, suave... todo iso é moi importante para nós. De feito, os picardías e camisóns un pouco máis especiais veñen todos en seda, en tecidos moi naturais".
Ademais desta liña, en Isa Baltasar traballan outras marcas de lencería e corsetería que tamén poden ser unha boa opción para regalar, aínda que non teñan un deseño especial para San Valentín.
As propostas para home tamén son variadas. "Para mozo tamén se fan cousas máis especiais para estas datas, como poden ser licras con estampaxes ou con motivos de San Valentín como corazóns ou frechas. Logo tamén hai transparencias con licras moi finas para sorprender. Tamén camisetas con licras transparentes e algodóns moi suaves con mesturas de lyocell que son moi suaves para a pel".
En marcas para home de cara ao Día dos Namorados en Isa Baltasar propoñen a firma francesa Hom "que é a que fai o que é máis sofisticado de licras, transparencias" e Impetus "que usa uns materiais fabulosos con algodón".
San Valentín é unha data que en canto a moda pecha a tempada invernal. Preguntámoslle a Pilar Gómez se nos pode avanzar as tendencias para esta primavera-verán. "Agora temos en tenda algunhas cosiñas novas, vai entrando o baño e si, temos a sorte de que vai ser un verán de moita cor, veñen estampados con cores moi vivas, laranxas, amarelos, verdes, todas as cores potentes. E iso tamén se transmite á corsetería, onde imos atopar estampados con verdes, amarelos, colorido moi alegre".
* Isa Baltasar está en Pontevedra en Novas Galerías Oliva, Nº 14 e tamén, desde Semana Santa ata finais de setembro, en Sanxenxo na rúa Luis Vidal Rocha.