A Selección Española Xuvenil de Balonmán, os Hispanos Promesas, volveu a fixarse nun novo talento do Club Cisne.
Xoel Lago foi citado para participar co equipo nacional no Campionato Mediterráneo 2025, que se celebrará nas localidades tunisianas de Hammamet e Nabeul este mes de abril.
O lateral pontevedrés foi chamado a poucas horas de iniciarse a concentración para cubrir a baixa de Adrián Solá, xogador do FC Barcelona.
Será a súa segunda citación internacional, tras ser parte dos Hispanos Promesas que se impuxeron no mes de novembro Torneo 4 Nacións de Tarazona, no que España se enfrontou ás seleccións de Portugal, Eslovenia e Alemaña.
Ademais Xoel Lago participou recentemente nunhas xornadas de tecnificación convocadas pola Real Federación Española de Balonmán no Centro de Alto Rendemento (CAR) de Sierra Nevada.
"Desde o Club Cisne Balonmán, queremos felicitar a Xoel por este novo logro, froito do seu traballo, esforzo e talento. É un orgullo para a nosa entidade ver como os nosos xogadores seguen a alcanzar éxitos e representando o club e á cidade a nivel internacional", sinalou o seu club, o Cisne, tras coñecerse a súa convocatoria.
A Selección Española Xuvenil ten previsto iniciar a súa concentración previa ao torneo este mesmo mércores 2 de abril en Madrid, viaxando a Tunes o próximo día 5.
A piques de cumprir os 16 anos de idade, Xoel Lago é un dos dous xogadores de equipos galegos citados para este torneo, xunto ao pivote William Thompson Bouzad (BM Cangas).