"Ximnasia de moitísimo nivel" para render homenaxe a Pablo Hinojar

Pontevedra
30 de xaneiro 2025

"Esperamos que o pavillón se encha", asegura Melania Rodríguez ante a gala de homenaxe ao que foi o seu adestrador e alma máter do Ximnasia Pontevedra, que se celebrará este sábado 1 de febreiro

Presentación da gala de homenaxe a Pablo Hinojar
Presentación da gala de homenaxe a Pablo Hinojar / Concello de Pontevedra

"Cremos e esperamos que o Pavillón Municipal se encha". Así o asegura Melania Rodríguez a poucos días de que se celebre a gala de homenaxe ao que foi o seu adestrador e alma máter do Ximnasia Pontevedra, Pablo Hinojar.

A ximnasta avanza que se verá "ximnasia de moitísimo nivel".

Por iso anima a todos os pontevedreses a acudir ao evento que lembrará "a persoa que nos ensinou absolutamente todo".

Celebrarase este sábado 1 de febreiro no Pavillón Municipal dos Deportes a partir das 17.00 horas, con entrada de balde para o público.

Todo iso coa presenza confirmada de "ximnastas de todas partes de España e de Portugal", explicou a secretaria da Federación Galega de Ximnasia, Belén Ferreiro.

A gala contará con exhibicións de ximnasia trampolín e acrobática incluíndo a representantes da Selección Española e a Selección Portuguesa, e é que todo o mundo da ximnasia envorcouse para mostrar o seu agarimo a unha persoa que deixou un recordo indeleble.

"A homenaxe fala da súa traxectoria pero tamén do legado que deixa na cidade", afirmou pola súa banda na presentación do evento a concelleira de Deportes, Anabel Gulías.

Serán en definitiva preto de dúas horas de "unha gala moi chula" e feita co máximo agarimo.