O importante operativo de voluntariado necesario para que o ITU Multisport Festival de triattlón resulte todo un éxito organizativo segue tomando forma.
Teresa Blanco e Miguel Balea, representantes da Asociación Oficina de Voluntariado de Pontevedra, mantiveron diversas reunións para sumar colaboracións para a gran cita deportiva do ano na cidade, que se celebrará entre o 27 de abril e o 5 de maio.
Unha delas tivo lugar na localidade portuguesa do Porto, onde se atoparon con Alcidio Jesus, técnico superior da Direcâo Rexional do Norte, pertencente ao Instituto Portugués do Desporto e da Juventude (IPDJ).
Neste achegamento acordouse que se inclúa o festival multideporte mundial que se celebrará en Pontevedra como unha nova actividade dentro das actuacións deste organismo para este 2019. Así, con esta medida, preténdese sumar ao redor de 50 voluntarios portugueses.
A intención da organización é desenvolver unha xornada de confraternidade con voluntariado español. A proposta é que todos participen na realización do percorrido dunha parte do Camiño Portugués a Santiago antes do inicio do Multisport.
Ademais avanzouse na intención de que alumnos dos tres campus da Universidade de Vigo (Pontevedra, Vigo e Ourense) poidan colaborar no evento, e tamén se exploraron vías de colaboración coa Escola Oficial de Idiomas de Pontevedra.
A campaña de captación de voluntariado para esta cita deportiva de ámbito mundial segue aberta a través da web pontevedra2019.org.