A Sociedad Deportiva Teucro mantén vivas as súas aspiracións de acceder ao play-off tras imporse ao Culleredo por un claro 32-23.
Sergio Wagner e Ricardo, con 8 goles cada un, foron os máximos anotadores do partido.
O encontro, aínda que con altibaixos, tivo un claro dominio local. Os azuis comezaron forte, cun 5-2 no marcador, pero tres erros consecutivos en ataque permitiron ao Culleredo igualar o partido (5-5).
Tras uns minutos de intercambio de goles, o Teucro recuperou as rendas do xogo. Peio apareceu baixo paus para deter uns sete metros e Ricardo situou o 12-9 cando restaban cinco minutos para alcanzar o descanso, ao que se chegou cun resultado de 14-11.
Despois do paso polos vestiarios o Culleredo saíu con forza e enchufou un parcial de 1-4 que igualou o marcador e obrigou a Irene Vilaboa a pedir tempo morto.
O Teucro tardou en reaccionar, ata que dúas boas accións defensivas de Wagner cambiaron o rumbo do duelo cando aínda restaban 15 minutos para a conclusión.
O técnico visitante parou o partido, pero unha nova perda de balón permitiu a Ricardo ampliar a diferenza a 22-18.
A partir dese momento, o equipo lerezano dominou o partido, sentenciando a vitoria cun claro 32-23, resultado que, ademais dos dous puntos, dá confianza ao equipo de cara ao próximo enfrontamento.
A seguinte xornada o Teucro visitará ao Porriño coa intención de sumar outros dous puntos que o manteñan na loita por disputar o play-off.
Consulta neste enlace as estatísticas do partido
