Vitoria pracenteira a que conseguiu a Sociedad Deportiva Teucro este sábado fronte ao pechacancelas SAR, que tivo os seus momentos durante o primeiro tempo pero foi arollado tras o descanso (23-30).
Despois duns primeiros minutos nos que primou a igualdade no marcador, unha xogada un tanto polémica marcou o punto de inflexión no partido.
O colexiado amoestou a Irene Vilaboa, os seus xogadores estreláronse en ataque e o conxunto de Redondela aproveitou a situación para coller a primeira vantaxe cando se chegou ao minuto 15 de xogo (11-8).
Reaccionou o Teucro acto seguido aproveitando a exclusión de Yeray Soutullo e endosou un parcial de 0-3 liderado por Brais Cerviño e un dobrete de Sergio Blond co que devolveron as táboas.
Tomou a dianteira de novo o SAR cos tantos de Lois Lago e o ex cisneísta Román Arboleya mesmo chegaron a poñerse cun colchón de tres goles, pero Rhuan Marchette aproveitou os últimos instantes para reducir distancias e irse ao descanso cun resultado de 16-14.
Tras o paso polos vestiarios cambiou todo completamente. Mantívose a igualdade durante os primeiros instantes pero unha dobre exclusión en menos dun minuto nas filas do cadro local descompuxo o partido.
Iván Vázquez e Lois Lago fóronse ao banco e o Teucro pasou a mostrar seguridade e superioridade en todas e cada unha das facetas de xogo e cun especialmente inspirado Marchette (19-22, min. 13).
Fixo tremer o resultado ao técnico do SAR, que decidiu parar o cronómetro para intenter reverter a situación, pero os de Lérez, firmes e efectivos, enchufaban dentro da rede practicamente todos os seus ataques e colocábanse cunha renda de seis goles que parecía imposible de neutralizar (20-26, min. 19).
E así foi, o Teucro seguiu ao seu apoiado en Rhuan Marchette (9 goles), Brais Cerviño e Sergio Blond (5 goles cada un), os máis activos en ataque por parte dos azuis para facerse cunha vitoria moi importante por 23-30.
Consulta as estatísticas nesta ligazón