O Pontevedra Club de Fútbol volve ser líder despois de superar ao mellor visitante do grupo, o Salamanca, por 3-1 no Estadio Municipal de Pasarón.
O conxunto granate realizou un gran partido a pesar de que lle custou materializar as ocasións que tivo, levándose un importantísimo triunfo que o aúpa o máis alto da táboa despois do empate do Numancia fronte ao Real Ávila.
O partido púxose de cara para o Pontevedra nada máis comezar. Cumpríronse tan só 5 minutos e os granates pisaron área cunha xogada por banda dereita, Fontán púxolla a Chiqui no punto de penalti e o estremeño, despois de irse de tres defensores, bateu a Jon polo pau curto.
A seguinte acción de perigo a favor dos locais non tardou en chegar, de novo tras unha gran acción pola dereita. Esta vez foi Chiqui o que lle puxo o balón a Rufo ao bordo da área, o madrileño cambiou á esquerda, onde estaba Álex, e este sacou un potente chute que se foi rozando a madeira.
Estaba a xogar ben o Pontevedra, pero o Salamanca tamén sabía as cartas que debía usar e cando. E así, ao cuarto de hora, chegou o empate na que era a primeira chegada dos visitantes a portaría de Edu Sousa. Curro cazou o balón dentro da área e non desaproveitou a ocasión para facer o 1-1 cun disparo á dereita do gardameta.
Pasaban os minutos e o dominio cambiaba de bando por momentos, aínda que sen facer acto de presenza en ningunha portaría. De feito, non foi ata que se alcanzou a media hora de xogo cando volveu haber algún indicio de perigo.
Héctor avisou de lonxe para pór a proba a Jon, que atrapou sen problemas e, pouco despois, o lateral repetiu a mesma xogada en busca do 2-1, obrigando esta vez ao gardameta visitante a empregarse a fondo para evitalo.
Diego, no 37, tentouno para o Salamanca cunha falta lateral na que Pelayo viu amarela e que Edu desviou baixo paus, e Álex González e Rufo fixeron o propio para o seu equipo ao fío do descanso. Con todo, o man a man entre o capitán e o gardameta gañouno o xogador visitante, e o disparo do madrileño desde a media lúa foise fóra por moi pouco.
Ao regreso dos vestiarios, o Pontevedra tardou tan só un minuto en xerar perigo cun pase en longo de Pelayo cara a Dalisson que Álex González finalizou por fóra. Pouco despois tívoa tamén o central granate cun remate de cabeza á saída dun córner que, novamente, foise desviado.
Co Salamanca aplicado en defensa, aos locais custáballes un mundo atopar espazos para pisar área rival. Iso si, unha vez pasado o minuto 65 de xogo, as cousas cambiaron por completo. Javi Fontán pasoulle o balón a Chiqui, este deullo a Héctor en liña de fondo e o 22 enviou un pase da morte a Álex González, que empuxou o balón á rede para subir o 2-1.
Pasou a asediar o Pontevedra a área rival e, cinco minutos despois, chegou a polémica por un posible gol pantasma de Charly que o colexiado decidiu non conceder.
Pasaban os minutos e os nervios palpábanse no ambiente a pesar de que eran os granates os que tiñan as mellores ocasións. Con todo, non conseguían dinamitar o choque porque Jon, baixo paus, estaba a ser un auténtico muro e sacábase auténticos paradones cos que evitaba unha maior goleada.
Un deles foi a Chiqui, que se foi en velocidade e, no man a man, tentou picarlle o balón, e o seguinte a Dalisson cunha gran estirada abaixo.
Entrou o partido no tempo de desconto e, como non, o Pontevedra deleitou á súa afección co gol do a sentenza. Xabi plantouse no man a man co gardameta e regaloulle o balón a Cambil, que chegou só pola esquerda, e rematou a pracer para anotar o 3-1 final.
PONTEVEDRA CF (3): Edu Sousa, Javi Fontán (Garay, min. 68), Igor, Álex González, Rufo (Iago Novo, min. 59), Yelko (Cambil, min. 81), Chiqui (Xabi, min. 81), Samu Mayo, Dalisson, Pelayo e Héctor (Charly, min. 68).
SALAMANCA CF UDS (1): Jon, Souly, Murua, Cristeto, Amaro, Maikel (Martín, min. 45), Diego (Alvarito, min. 56), Curro, Caramelo (Ares, min. 68), Loren (Javi, min. 68) e Ian (Iván Casado, min. 68).
Árbitro: Raul de la Mata Martínez (Colexio madrileño), auxiliado nas bandas por Gonzalo Ramanillos García e Ángel Vicente Juárez. Amoestou a Pelayo (37'), Iago Novo (65'), Samu Maio (74'), Garay (85') e Igor (90+2') no Pontevedra e a Cristeto (65') no Salamanca.
Goles: 1-0, Chiqui, min. 5. 1-1, Curro, min. 15. 2-1, Álex González, min. 67. 3-1, Cambil, min. 90+3.
Incidencias: Partido da xornada 14 de liga en Segunda RFEF, disputado no Campo Municipal de Pasarón (Pontevedra) ante 2.154 espectadores.
