O partido polo ascenso a Primeiras RFEF entre Pontevedra Club de Fútbol e Betis Deportivo no Estadio Municipal de Pasarón (domingo 2 de xuño, 18.00 horas), xa ten árbitro designado.
O Comité Técnico de Árbitros (CTA) deu a coñecer este xoves as designacións para os partidos de volta da segundo e última eliminatoria do play-off, escollendo para o duelo dos granates a un colexiado madrileño.
Trátase de Jerónimo Montes García-Navas, árbitro de ampla experiencia en Segundo B e Segunda RFEF, categoría na que dirixiu 106 encontros ao longo das últimas nove tempadas.
No caso dos granates, cruzouse en seis ocasións co equipo da Boa Vila, cun balance de tres triunfos pontevedreses e tres empates, sen derrotas.
A última vez que arbitrou ao Pontevedra foi nun encontro importante esta mesma tempada, o enfrontamento fronte ao Ourense CF da primeira volta da liga en Oira (0-0). Ademais con el os granates venceron o Tudelano na campaña 14-15 (2-0 en Pasarón), o Burgos na 16-17 (2-1 en Pasarón) e o Celta B na 19-20 (1-2 en Barreiro), con empates fronte a Boiro na 16-17 (1-1 fóra da casa) e Valladolid B na 17-18 (1-1 en Pasarón).
En canto ao Betis Deportivo, arbitroulle en dúas ocasións, ambas as dúas na campaña 22-23, cun empate sen goles fronte ao Recreativo de Huelva como local e un triunfo a domicilio fronte ao Utrera (1-4).
Montes García-Navas estará auxiliado nas bandas por Daniel Sánchez Lázaro e Fernando Luciano Ventura Verderico.