A Sociedad Deportiva Teucro foi de menos a máis no seu enfrontamento ante o Porriño, pero reaccionou na segunda metade para levar o triunfo por 29-32.
Con esta vitoria, o equipo lerezano suma dous puntos vitais que lle premiten manterse na zona alta da clasificación e na pelexa por poder disputar a fase de ascenso.
O encontro comezou cun forte dominio das defensas e con ambos os gardametas mantendo as súas portarías a cero durante o primeiros cinco minutos e medio. Tras o 0-0 inicial, foi o conxunto local o que rompeu a seca para establecer o 2-0 no marcador.
Custáballe ao Teucro atravesar a defensa rival e non abriu a lata até o minuto oito cun lanzamento desde o sete metros de Areias.
Tras o tanto, os pupilos de Irene Vilaboa empezaron a atoparse mellor en tarefas ofensivas e, cun parcial de 0-3, reduciron as distancias a tan só un gol.
Guillermo Fernández, con dous tantos consecutivos devolveu a vantaxe ao Porriño a falta de dous minutos para chegar ao descanso (14-11), pero Wagner, desde o sete metros, fixo o 14-12 co que puxo fin á primeira metade.
Despois do paso polos vestiarios o guion cambiou por completo e, con parcial de 0-4,o conxunto lerezano adiantouse por primeira vez en partido (14-16).
Adiantou a defensa entón o técnico local e, aínda que freou o empuxe ofensivo do Teucro, non serviu para que o seu equipo reducise distancias. A defensa teucrista mostrouse sólida e entre Ricardo González e Marchette encargáronse de manter a vantaxe.
Produciuse entón un intercambio de goles en ambas as portarías que beneficiou ao cadro visitante, ata que se alcanzaron os minutos decisivos, nos que o Porriño intensificou a súa presión para tentar recuperar balóns o máis rápido posible.
Martín Rodríguez achegou aos locais a dous goles (28-30, min. 58), pero os de Lérez mostráronse impasibles e aseguraron o triunfo cos tantos de Wagner e Ricardo González (29-32).
Consulta as estatísticas neste enlace