A só un paso está xa de converterse oficialmente en olímpica a pontevedresa Teresa Abelleira.
A centrocampista do Real Madrid foi citada este martes para unha nova concentración da Selección Española Absoluta de Fútbol, da que é xa unha habitual, coa particularidade de que ademais de afrontar un dobre duelo da fase de clasificación do próximo Europeo (para o que España xa se clasificou matematicamente) estas xornadas servirán para preparar os Xogos Olímpicos de París.
A seleccionadora nacional, Montse Tomé, citou 26 xogadoras a esta convocatoria, que comezará o día 30 de xuño e alongarase ata o día 17 de xullo, catro días antes de que o equipo olímpico poña rumbo a Francia.
| ¡LISTA DE MONTSE TOMÉ!
— Selección Española Femenina de Fútbol (@SEFutbolFem) June 25, 2024
Estas son las 26 elegidas para los dos últimos partidos de clasificación para la #WEURO2025 y la preparación de los Juegos Olímpicos.#JugarLucharYGanarpic.twitter.com/HTjHu06sIh
No que respecta á lista para os Xogos, só poderá ser de 18 futbolistas (máis catro reservas), polo que Tomé deberá aínda realizar varios descartes.
Abelleira en todo caso foi unha fixa nas convocatorias de España desde o Mundial, polo que a súa presenza nos Xogos é unha posibilidade moi real.
Antes de tomar a decisión sobre a lista definitiva, España pechará a fase de clasificación para a Eurocopa ante República Checa o 12 de xullo no Letní Stadium (Chomutov) e ante Bélxica o día 16 de xullo no estadio coruñés de Riazor.