Recuperaron o campo de Bora a base de moito traballo e desde alí queren seguir crecendo como unha nova opción deportiva para os pontevedreses.
Son 'Relámpagos', un club de béisbol e sóftbol fundado en 2021 e que presume de "ser case como unha familia", afirma o seu presidente, Queco Lago.
"Creo que practiquei case todos os deportes que se practican aquí e nunca me sentín así", afirma sobre o sóftbol, deporte incluído por certo no programa dos Xogos Olímpicos de Los Ángeles 2028.
Similar ao béisbol difire só en pequenos detalles como o tamaño da pelota, máis grande provocando que sexa máis complicado lanzala lonxe e reducindo así a superficie de xogo, ou na obriga de que o lanzador execute a súa acción por baixo da cadeira.
Cando empezaron, recoñece, "só coñeciamos o deporte polas pelis", pero agora adestran e xogan case todas as semanas, sendo dos poucos equipos federados de Galicia.
Este domingo 23 de marzo de feito teñen partido no campo de Bora, a partir das 16.00 horas, e lembran que "é gratis", como tamén o é ir probar os seus adestramentos, para homes e mulleres.
Pero queren máis, e por iso pensan xa en chegar aos nenos e nenas da comarca. "Ímonos a centrar en seguir mellorando o noso campo para que poidan vir nenos", avanza Lago coa idea de darse a coñecer entre os centros escolares.
"Eu sinto que aí empezaría todo", afirma o presidente de Relámpagos, co soño de consolidarse como una alertativa máis entre as moitas entidades deportivas pontevedresas.
De momento son preto de 40 as persoas as que adestran regularmente cos Relámpagos, dos que 19 son xogadores federados. Un xerme que empeza a florecer e que esperan sexa só o principio.
É posible contactar con eles nos seus perfís de redes sociais.