deportes

Seis partidos para unha pretempada do Arosa que arranca o 24 de xullo

O Salnés
22 de xullo 2024
PontevedraViva

O club arlequinado confirmou o seu calendario de encontros de preparación para o verán, condicionado pola súa participación na Copa Federación. O primeiro persoal arosista iniciará os adestramentos este próximo mércores 24 de xullo, mentres que o seu primeiro compromiso disputarase o día 3 de agosto  

Presentación de Míchel Alonso como novo adestrador do Arosa
Presentación de Míchel Alonso como novo adestrador do Arosa / Arosa SC

O Arosa SC conta xa as horas para dar oficialmente comezo á pretempada do seu primeiro equipo.

Míchel Alonso citou os seus futbolistas o vindeiro mércores 24 de xullo á primeira sesión de adestramento, que tendra lugar ás 11.00 horas da mañá no campo de fútbol Manuel Jiménez, e é que o horario de traballo matinal é un dos cambios implantados este verán co novo proxecto deportivo.

Mentres non chega ese momento, o club arlequinado confirmou o seu calendario estival, con ata seis encontros de preparación entre Copa Federación e partidos amigables.

O primeiro encontro de pretempada do Arosa será precisamente na fase autonómica de Copa Federación, recibindo na Lomba o Alondras o sábado 3 de agosto (20.30 horas). Dependendo deste encontro e de se o equipo segue adiante nesta competición o resto de choques pactados poden sufrir variacións.

Eses amigables seguirán o sábado 10 de agosto en Baltar (21.30 horas) fronte ao Portonovo, RC Celta Fortuna o sábado 17 de agosto (20.00 horas, A Lomba), RC Deportivo Fabril  o xoves 22 (20.00 horas, A Lomba), Umia CF o mércores 28 (20.00 horas, Zacande) e por último o domingo 1 de setembro contra o Céltiga no Salvador Otero da Illa.

Máis novidades